Patay sa ambush

LAWAS sa tag-iya og bakery natusak sa mga bala dihang siya gi-ambusan sa duha ka mga lalakeng nag-bonnet niadtong Lunes sa gabii sa awaaw nga lugar sa Sitio Guya, Barangay Prenza, lungsod sa Balamban.

Si Basiliso Belda, 38, minyo, negusyanteg bakery, taga Barangay Vito, namatay sa mga samad pinusilan sa ulo ug buko-buko samtang nakalingkawas ang iyang panadero nga si Benjamin Condrillon, 23, taga Brgy. Cambuhawe.

Ang biktima uban ni Condrillon gikan sa Barangay Prenza nga nagpalit og uling aron maoy isugnod sa paglutog pan.

Apan sa ilang pagpauli diin siyay nagdala sa motorsiklo, ang duha ka mga killer nga pulos naka-bonnet nagbarog sa karsada ug usa niini nipara kanila.

Sa iyang paghunong,, usa sa mga killer nipusil kaniya makadaghang mga higayon hinungdan sa pagkahagba sa iyang motorsiklo.

Bisan kon samdan, nakadagan pa ang biktima pipila ka metros apan naabtan ug giusban pagpusil.

Si Condrillon nakadagan apan ni-bulonataryo sa pagpa-ubos sa paraffin test aron sa paglimpiyo sa iyang kaugalingon sa kremin.

Si SPO3 Arvie Banate, imbestigador sa Balamban police nga nahinabi sa Sun.Star Superbalita, niingon nga upat ka mga anggulo ang ilang gisusi karong panahuna nga posibling motibo sa kremin.

Una niini, ang biktima dunay gikabangi nga may kalambigitan sa yuta sa ilang dapit nga pending pa karong panahuna.

Ikaduha angillegal nga drugas kay ang asawa mismo nitug-an nga tiggamitan sa illegal nga drugas ang biktima.

Ikatulong anggulo nga ilang gisubay mao ang love angle.

Ilang nahibaw-an nga ang biktima ug ang iyang asawa magsigig away tungod sa pagsegig selos sa namatay.

Ang ikaupat mao ang pagkasakop niini sa barangay intelligence network (BIN).

Samtang si Condrillon nibulontaryo kagahapong adlawa nga mopa-ubos sa paraffin test human nitumaw ang mga pagduda sa pamilya, ingon man sa imbestigasyon sa kapulisan nga nagkasungi ang pamahayag niini ug sa ilang saksing nakuha nga maoy gipalitag uling.