P100 mil nga shabu nasakmit sa raid

Wednesday, January 4, 2012

MGA sakop sa Regional Anti Illegal Drugs Special Operations Task Group (RAIDSOTG) ningonda sa balay sa manag live-in partner nga gikatahapang tigpayuhot og ginadiling drugas sa sityo Cabantan, Brgy. Luz, dakbayan sa Sugbo.

Ang mga suspek nga gironda kagahapon sa hapon giilang sila si Elly Libaton ug Grace Sarmiento.

Have something to report? Tell us in text, photos or videos.

Si Senior Insp. Henrix Bancoleta, team leader, niingon nga duha sila ka semanang naniid sa kalihukan sa duha ka mga suspek human nila madawat ang report nga tigbaligya kinig ginadiling drugas.

Kagahapon ilang gipahigayon ang operasyon.

Apan nakaikyas si Libaton agi sa luyo sa ilang balay lahos na ngadto sa mga balay sa iyang mga silingan.

Ang nasikop mao lang si Sarmiento.

Nakuha gikan sa mga suspek ang upat ka bulto sa gituohang shabu, nga gibana-bana nga mobalor og P100,000 ug mga paraphernalia.

Si Konsehal Limmy Lipatan sa barangay Luz, niingon nga dugay na usab silang nakadungog sa kalihukan sa manag live-in partner apan di lang gyod nila masikop.

Gitataw ni Lipatan nga sila sa barangay hugot gyud nga nagsuporta sa pagpakigbatok sa illegal nga drugas sa ilang dapit.