Re-routing gireklamo

Friday, January 6, 2012

NAKASUGAT og daghang mga reklamo ang dry-run sa re-routing sa mga sakyanan nga gipatuman sa dakbayan sa Mandaue kagahapon sa buntag.

Ang katuyoan mao ang pag-andam sa mga sakyanan nga moagi sa bag-ong merkado publiko nga ablihan ugma, Dominggo.

Have something to report? Tell us in text, photos or videos.

Wa pa miabot og pila ka oras ang pagpatuman sa re-rerouting, grabe na ang kahuot sa trapiko, ilabi na ang maggikan sa North Reclamation Area, nga mag-agi sa A. Soriano ave. ug ang padung sa dan P. Burgos.

Samtang pipila usab sa mga driver sa pampublikong sakayan naglibog kon asa gyud sila mo-u-turn, ilabi na ang duol sa Cebu International Convention Center (CICC).

Gani mi resulta pa kini og aksidente human nagbangga kagahapon sa buntag ang usa ka puj ug motorsiklo.

Si Antemio Matus, driver sa PUJ, niingon nga naglibog siya kon asa mo u-turn.

Wa siya kabantay nga adunay motorsiklo sa iyang luyo nga  paspas nakapadagan nga maoy hinungdan nga nagbangga sila.

Kasagaran sa mga driver nagyawyaw kay nahasol sila tungod sa re-routing.

Apan alang sa hepe sa Traffic Enforcement Agency of Mandaue (TEAM), Edwin Ermac, nga expected na nila nga aduna gyuy susama sa mga reklamo nga mogawas mahitungod sa rerouting.

Dugang niya nangita lang gyud silag pamaagi aron matubag ang hangyo sa mga mamaligyaay sa umaabot nga bag-ong merkado.