49-anyos gipatay tungod sa ice cream

Sunday, January 8, 2012

TUNGOD lang sa nalumping nga tabon sa ice cream, usa ka lalake gipatay sa dakbayan sa Mandaue.

Nahitabo ang insidente pasado alas 6:00 niadtong Sabado sa gabii sa dalan Hernan Cortes, Barangay Subangdaku.

Have something to report? Tell us in text, photos or videos.

Ang namatay giila sa kapulisan nga si Reynaldo Colina, 49, ug molupyo sa samang dapit.

Samtang ang gikatahapan mao si Manuel Olasiman, hingkod ang panuigon, ug taga Barangay Subangdako, ug manindahay tulodtulod nga ice ream.

Base sa imbestigasyon sa kapulisan, adunay nipalit og ice cream hinungdan nga gikuha ang tabon.

Apan ang tabon gilingkoran sa biktima hinungdan nga nalumping ug nasuko ang gikatahapan nga miresulta sa ilang panaglalis.

Ang gikatahapan nipauli sa ilang balay apan sa pagbalik nagdalag nag kutsilyo ug gidunggab ang biktima sa iyang dughan.

Dali untang gidala ang biktima sa Mandaue District Hospital, apan gideklarar nga patay nang midangat sa tambalanan.

Ang kapulisan sa Mandaue nga nipahigayon og follow-up operation ug nasikop ang gikatahapan didto na sa ilang balay.

Karong adlawa, ang Homicide section sa Mandaue City Police Office (MCPO) gikatakda nga mopasaka og kasong homicide batok sa gitanggong suspek.