Bag-ong merkado sa M’daue pormal giablihan kagahapon

Sunday, January 8, 2012

MALAMPUSONG gibuksan kagahapon ang bag-ong merkado sa dakbayan sa Mandaue.

Nahimotang kini sa luyong bahin sa Mandaue City Sports Center sa Reclamationa Area.

Have something to report? Tell us in text, photos or videos.

Atol sa pagbukas, nitambong ang mga opisyal sa Mandaue pinangulohan ni Mayor Jonas Cortes ug mga sakop sa konseho.

Lakip sa nitambong ang pamilyang Ouano nga gipangulohan nila ni kanhi Mayor Pedong Ouano, kanhi mayor ug karon Board Member Teddy Ouano.

Samtang, si Bise Gobernador Agnes Magpale maoy nirepresentar ni Gobernador Gwen Garcia uban ni Mayor Teresita Alegado sa Consolacion.

Ang yanong pagbukas sa bag-ong merkado giunhan sa usa ka santos nga misa ug mga mensahe sa mga bisita.

Si Board Member Teddy Ouano nipadayag sa iyang kalipay nga sa pagbukas na sa maong merkado sanglit sa iya man kining panahon gisugdan ug mao gayod kini ang iyang damgo nga makabaton na og modernong merkado ang dakbayan sa Mandaue.

Iyang gipasalamatan si Mayor Jonas Cortes nga nipadayon sa maong proyekto ug hingpit nang napahimuslan sa taga Mandauehanon.

Si Mosuline Suliva, market administrator, niingon nga human naablihan ang ilang bag-ong merkado ila na usab nga sugdan sa pagkoral ang ilang karaang merkado ug 98 porsyento sa mga manindahay sa karaang public market ang nibalhin sa bagong merkado.

Ang merkado moabli sa alas 3:30 sa kaadlawon hangtud sa alas 10:00 sa gabii.

Samtang ang ibabaw nga bahin alang na sa mga kalingawan ug kan-anan ug uban pang mga baligya mag-abli alas 7:00 sa gabii hangtud na sa alas 4:00 sa kadlawon.

Gani gipahibawo ni Suliva nga ang Bureau of Internal Revenue (BIR) nga anaa nagbase sa Mandaue mamalhin na sa ilang bag-ong merkado sa ibabaw nga bahin ug mag-abang kini sa Mandaue City Hall.

Gipasalig usab ni Sulina nga hugot gayod nilang gi-monitor ang mga timbangan sa mga manindahay nga sakto gyud sa timbang.