P250 mil nga cash, alahas nadala

Thursday, January 12, 2012

USA ka 70 anyos nga babaye nailad og P250 nga balor sa cash ug mga alahas sa duha ka mga babaye gidudahang mga sakop sa Budol-budol gang sa dakbayan sa Mandaue.

Ang biktima giila sa kapulisan nga mao si Marianita Figuracion, 70, taga sityo Timpolok, Barangay Babag-I, dakbayan sa Lapu-Lapu.

Have something to report? Tell us in text, photos or videos.

Si Figuracion nibutyag sa kapulisan nga ingon sa gi-hypnotized siya sa mga mangingilad nga maayo kaayong midala og sulti.

Ang kapulisan daan nang mipahimangno sa publiko sa pagmabinantayon, labina sa kapistahan ni Sr. Sto. Niño nga maoy tigdagsa sa mga mangingilad dinhi.

Sigun sa iyang asoy ngadto sa Mandaue City Police Office (MCPO) nga gikan siya ni-withdraw og kuwarta sa usa ka ATM machine sa may dalan M.C. Briones, pasado alas 4 sa miaging hapon.

Adunay usa ka babaye nga nagpaila kaniya nga iyang silingan ug nidala kaniya sakay sa usa ka sakyanan paingon sa usa ka restaurant.

Samtang didto na sila sa sulod sa usa ka restaurant, laing babaye nga Tagalog-speaking ang niduol kanila.

Nipaila kining negosyante nga nangita og hauling firm aron maka-haul sa iyang mga sinakong bugas sa Dumaguete City.

Kunohay giyahan siya sa unang babaye nga maoy unang niduol kang Figuracion, nanakay silag balik sa usa ka sakyanan.

Niadto sila sa Carbon market aron kuhaon ang P1 ka milyon gikan sa usa ka negusyante sa merkado nga ibayad sa kompaniya.

Nikanaog ang unang babaye ug nibalik nga niingon nga P700,000 lang ang iyang dala nga kuwarta.

Sulod sa sakyanan, gipabutang sa duha ka mga mangingilad ang P50,000 nga gi-withdraw sa biktima ngadto sa bag nga giingong naa ang P700,000.

Ang biktima gipahibawo nga binlan siya sa maong kantidad ug ipasulod lang una ang iyang gi-withdraw samtang nanguli sila sa balay ni Figuracion aron ipakuha ang uban niyang mga alahas ug kuwarta ingon man mahalon nga mga cell phone.

Sama sa gihapon, nimando ang mga suspek nga ipasulod sa bag ang mao nga mga butang.

Didto nagsugod na ang sigig estorya ug gikuha ang iyang kuwarta ug alahas nga mokantidad na sa P250,000.

Human makuha, gibiyaan siya uban sa bag nga gituohan niyang adunay sulod nga P700,000.

Apan sa dihang iyang gisusi ang bag kay wa na mobalik ang mga mangingilad, pulos ra kini mga ginunting nga papel.

Wa na sab diha ang iyang mga butang ug salapi nga gihinayhinay diay sa pagkuha sa duha ka mga mangingilad.

Ang kapulisan nanawagan sa katawhan nga di mokompyansa ni bisan kinsa ug labaw nang di makig-estorya kon di makaila aron di mailad.