100 mil ang mikuyog sa Traslacion

Friday, January 13, 2012

MALINAWON ug malampuson nga napahigayon ang Walk with Mary kagahapon sa kaadlawon ug Traslacion kagahapon sa buntag tungod sa hugot nga seguridad nga gipatuman sa kapulisan ug kooperasyon sa mga deboto.

Si Chief Insp. Romeo Santander, hepe sa City Intelligence Branch sa Cebu City Police Office nagkanayon nga wa silay nasugatan nga problema samtang nagpadayon ang duha ka relihiyuso nga mga kalihukan subay sa kapistahan ni Señor Sto. Niño ugma.

Have something to report? Tell us in text, photos or videos.

Iyang gibanabana nga miabot og 100,000 ka mga deboto ang ningsalmot sa Walk with Mary gikan sa Fuente Osmeña paingon sa Basilica del Santo Niño nga matod niya mas daghan kon itandi sa Walk with Jesus niadtong miaging semana nga miabot og 80 mil ka tawo.

Alas 4:30 sa kaadlawon, nasugdan ang penitential walk human naabot ang imahe sa Birhen sa Guadalupe gikan sa Archdiocesan Shrine of our Lady of Guadalupe Parish.

Ang Walk with Mary gipahigayon sa ika-siyam ug katapusang adlaw sa nobenaryo diin tuyo nga itagbo ang Birhen Maria sa iyang anak nga si Señor Sto. Niño ug dungan nga ihatod sa National Shrine of St. Joseph sa Mandaue City.

Si Virginia Uy, usa sa mga deboto naggakos pa sa dala niya nga imahe sa Señor Sto. Niño samtang nangaliyupo nga ayuhon ang iyang gihambin nga sakit, (wala hinuon niya giasoy kon unsa iyang sakit) ug nag-ampo usab siya og kahiusahan sa ilang pamilya.

Siya uban sa liboan ka mga deboto puno sa paglaom nga dunggon sa Ginuo ang ilang mga pag-ampo labi na nga ugma na gyud ang kapistahan sa Milagrusong Bata.

Si Msgr. Jose Montecillo, parish priest sa Archdiocesan Shrine of our Lady of Guadalupe Parish sa iyang wali human sa pag-abot sa imahen sa Basilica, nipahinumdom sa mga tawo nga mahinungdanon ang pagtabang sa atong isig ka tawo labi na sa mga masakiton sama sa ebanghelyo kagahapon nga sinuwat ni San Marcos.

"Ang sangla usa ka simbolo sa sala,” matod niya ug ang naagi-an nato nga pag-antos kabahin lang sa atong nahimo nga sala.

Human niini, gisunod dayon ang Traslacion mass nga gidumala ni Msgr. Cristobal Garcia, chairman sa Commission on worship sa Artsidyosesis sa Sugbo.

Ang iyang wali, nagsentro sa pamilya nga matod niya maoy buhing saksi sa mga Christian values nga gitudlo sa Ginuo.

Siya nidugang nga bisan og unsa kagubot ang usa ka banay, naa gihapon ang Dios ug dili niya biyaan.

“Kay ang Dios naa sa inyong banay... Bisan og nagkayamukat ang inyong banay kay naa gihapon siya, wala mo biya-i,” siya nidugang.

Sama sa nangaging motorkada, daghang mga tawo ang nagpaabot daplin sa nagkalain-laing mga kadalanan nga kabahin sa rota sa Traslacion o ang paghatod sa mga imahe ni Birhen Maria ug Sto. Niño uban sa Ecce Homo paingon sa St. Joseph Shrine sa Mandaue City.

Si Jonah Reman, 29, taga Brgy. Subangdaku, dakbayan sa Mandaue, kugos ang kamanghurang anak, nag-atang sa mga imahen.

Matod niya nga pito ka mga tuig na niya kining gibuhat.

Kanunay niyang gihangyo ang maayong kaugmaon ug panglawas sa iyang pamilya, labina sa iyang mga anak.

Mas taas ang rota sa Traslacion karong tuiga kon itandi sa miaging tuig, tungod kay niagi pa ang motorkada sa mga kadalanan sa Jakosalem, Gen. Maxilom Ave., Gorordo Ave., Gov. Cuenco, Juan Luna St., M.J. Cuenco dayon paingon na sa St. Joseph Shrine.

Mga opisyal sa dakbayan sa Mandaue pinangulohan ni Mayor Jonas Cortes uban nila ni Gobernador Gwen Garcia ug Bise Gobernador Agnes Magpale ang nidawat sa mga imahen nga gitambungan usab ni Cebu City Mayor Michael Rama.

Si Msgr. Adelito Abella, kura paroko sa National Shrine of St. Joseph apil sa nidawat ug nihalad og Santos nga Misa diin ang mga imahen gipahigda sud sa usa ka gabii sa dili pa dad-on pagbalik sa Basilica.