`Tulisan’ misukol sa mga pulis, patay

Friday, January 13, 2012

NAMATAY ang usa ka gikatahapang tulisan ug karnaper dihang nakigpinusilay sa kapulisan sa Mandaue Cty human niya tulisa ug sa iyang kauban ang usa ka dalaga.

Nadakpan ang iyang kauban nga niangkon sa krimen samtang usa ka bystander ang napagan human pusila sa mga suspek ang dalagang biktima nga nisukol kanila.

Have something to report? Tell us in text, photos or videos.

Ang biktima nga si Aprille Batingan Decierdo, 23, dalaga, cashier sa Home Builders, taga AS Fortuna, Banilad Mandaue city,nasamdan human dunggaba sa suspek nga si Mark de la Cruz.

Ang biktima naglakaw pasado alas 8 sa gabii niadtong Huwebes sa mao nga dapit diin naa ra sab ang iyang trabahoan.

Si Chief Insp. Rex Lomente, hepe sa Investigation Detective Management Branch (IDMB), niila sa suspek nga nadakpan nga si Mark Dela Cruz,31, lumad nga taga Danao City.

Ang nawong ni de la Cruz napuno na sa bun-og dihang gikuha sa mga pulis human gitabangan og kulata sa mga bystander sa brgy. Banilad.

Ang ang ikaduhang suspek nga napatay sa kapulisan naila lang sa ngan nga Joseph, lumad nga taga lungsod sa Borbon, amihanang Sugbo.

Si Lomente niingon nga si Decierdo paingon na mopauli sa ilang balay sa dihang kalit lang niabot ang duha ka mga suspek nga nagsakay og motorsiklo.

Ang angkas nga si Dela Cruz maoy nikanaug ug nikuha sa bag sa biktima, apan kini nisukol.

Mao kini ang nakaaghat kang dela Cruz sa pagdunggab sa buko-buko sa biktima nga nalamba.

Ang mga kauban sa biktima nga nakakita sa hitabo daling nanawag sa mga pulis.

Matod sa usa ka saksi nga di gustong nganlan nga ang mga kauban sa biktima nanukol usab.

Si Joseph giingong nipusil sa usa ka konduktor apan maayo gani kay senina lang ang naigo sa pagpusil.

Apan usa ka bystander nga diha sa atbang sa nahitabon napagan ug naigo sa tiil.

Daling nakapahibawo sa kapulisan ang mga kauban sa biktima ug nipahigayon og hot pursuit operation.

Naabtan ang mga suspek sa mga pulis hinungdan nga nahitabo ang engkuwentro nga maoy gikamatyan sa usa sa mga suspek.

Si Dela Cruz maoy gitumbok nga suspect sa upat ka mga pagpangawat og mga motorsiklo sa siyudad sugod niadtong Disyembre.

Giangkon usab  sa suspek apan iyang gitug-an nga napugos lang siya sa pag-uban sa pagpangarnap sa giingon niya nga mastermind nga si Joseph.

Dali untang gidala si Joseph sa Vicente Sotto Memorial Medical Center apan gideklarar nga patay nang midangat sa tambalanan.