200 ka mga balay naugdaw sa sunog

Monday, January 16, 2012

MOKABAT sa P2 milyunes ang gibiling danyos sa sunog sa dakbayan sa Mandaue kagahapon sa buntag nga niugdaw sa 200 usab ka mga balay.

Ang sunog niigo sa Lower Tungasan, sityo San Lorenzo, Barangay Jagobiao.

Have something to report? Tell us in text, photos or videos.

Nadawat ang alarma sa sunog alas 11:37  samtang nakontrolar sa kabomberohan ang kayo sulod sa 28 minutos sukad sa ilang pagsugod og kombate.

Si SFO1 Arnold Lao, imbestigador sa kaso, niingon nga sa ilang pasiunang inbestigasyon nagsugod ang sunog sa balay sa usa ka Laurencia Dumalagan.

Matod ni Lao nga sa ilang nahipus nga impormasyon dunay nabati nga piti ang nagpuyo sa bay ni Dumalagan sa wa pa moulbo ang kayo sa iyang balay.

Si Francisca Anu-os usa sa mga nasunogan, nitug-an nga tungod sa kadali sa pagkatap sa kayo wa na gyud silay  nahipos pa sa ilang mga butang tungod kay gisiguro lang niya ang iyang mga apo ug mga sakop sa pamilya.

Gidugang niya nga tungod kay nagsikit-sikit ang ilang mga bay ug ginama lang usab kini og light materials, dali ra gyud kining giugdaw sa kayo.

Gibutyag ni Lao nga mokapin sa 200 ka mga balay ang hingpit nga nangaugdaw samtang P2 milyones ang gibling danyos.

Tungod sa kadako sa kayo gisaka sa Mandaue City Fire Department ang sunog ngadto na sa Task Force Bravo.

Hinuon way gikatahong adunay nakalas o ba kaha naangol atol sa hitabo sa sunog.

Dali usab nga nisusi sa sitwasyon sa mga nasunogan si Mandaue City Mayor Jonas Cortes.