17 ka barangays sa Compostela nag-antos

Tuesday, January 17, 2012

NIDANGOP sa Kapitolyo kagahapon sa buntag ang 17 ka mga barangay kapitan sa lungsod sa Compostela aron magpatabang nga ayuhon na ang ilang gubaon nga mga karsada sa ilang mga barangay.

Ang kakuwang sa mga opisyal nga maoy modumala sa renda sa pangagamhanan sa Compostela maoy nakitang hinungdan ni Gobernador Gwen Garcia nga matanggong gyud ang pagpatuman og mga proyekto sa lungsod labi na sa infrastructure.

Have something to report? Tell us in text, photos or videos.

“Way konseho mopasar sa budget, way mayor nga mo-implementar. Duna tuod OIC sa DILG but his hands are tied kay way budget, reenacted ang budget since pila na to ka tuig, ug tungod niana ang mga present nga priorities dili na matubag...” matod sa gobernador dihang nahinabi sa mga tigbalita sa Kapitolyo kagahapon.

Nonot niini, gimando-an ni Garcia si Provincial Engineer Eulogio Pelayre nga magdala og ekipo ug ayuhon ug aspaltuhon ang gubaon nga mga karsada.

Matod sa gobernador nga ang mga provincial roads lang una ang ilang i-prayoridad sa pagpaayo apan kon dunay barangay road nga kinahanglan na kaayo nga ipaayo, apilon usab kini.

Si Garcia niasoy nga lahi ang yuta sa Compostela gumikan kay bisan og gi-aspalto na ang karsada dunay mogawas nga tubig hinungdan nga maguba ug makankan nga moresulta sa landslide.

Iya usab gipasusi ang illegal parking sa mga provincial road sa mga container vans sa usa ka kompaniya nga gireklamo sa usa ka kapitan atol sa nahitabong tigom sa Kapitolyo kagahapon.

Suma niya nga ilang tinguha nga ang tabang sa Kapitolyo adto idirekta sa mga kapitan aron sila na ang molihok sa tagsa-tagsa ka barangay.

Sa buwag nga interview, si Cogon Barangay Kapitan ug Compostela Association of Barangay Council President Joven Amor nagkanayon nga napun-an gyud ang problema sa ilang lungsod tungod kay way naglihok nga mga elected official sa munisipyo. Malaumon sila nga masolusyonan na sa Comelec ang problema sa pulitika sa ilang lungsod.

“Kami, hangtod karon wa mi wad-i og paglaom mahuman na nila. Murag very degrading na sa ilang part og dili mahuman hangtod sa sunod eleksiyon, di ba simple case,” pahayag sa kapitan sa pakighinabi sa mga sakop sa media.