Gipang-carnap nabawi

Wednesday, January 18, 2012

NAKUHA na sa kapulisan sa Mandue City Police Office (MCPO) ang mga motorsiklo nga giingong gipang-carnap sa grupo sa mga notadong tulisan nga na-engkuwentro sa kapulisan sa miaging semana diin usa kanila napatay.

Si Insp. Ramil Morpos, deputy chief sa Investigation and Detective Management Branch (IDMB), niingon nga ang mga motorsiklo nakuha na og balik sa kapolisan human mitug-an si Marlon Andrino, kinsa ilang nasikop.

Have something to report? Tell us in text, photos or videos.

Si Andrino nasikop sa kapulisan niadtong Biyernes dihang nisuway pagpanulis sa barangay Banilad kauban si Junie Caraat, kinsa namatay sa shootout tali sa kapulisan.

Nitug-an si Andrino ngadto sa kapulisan kon asa ug kang kinsa nila gibaligya ang duha ka mga motorsiklo sa presyo nga di moubos sa P6,000.

Nihibaw-an usab nila Morpos nga ang Suzuki Smash motorcyle nga gihimong get-away vehicle nila ni Andrino ug Caraat gipanag-iya diay sa usa sa mga biktima nila nga si Arnel Ambos.

Nitug-an si Ambos, taga Day-as, siyudad sa Sugbo, nga siya gitulis nila ni Andrino pinaagi sa pagtion og armas niadtong Disyembre 9.