Mga alahas giangkon na, kuhaon

Thursday, January 19, 2012

HUMAN sa ilang pagdiki-diki sa pag-angkon sa mga alahas nga napalgan sa mga basurero sa Umapad dumpsite sa Mandaue City, ang banay nga Tan niangkon na nga ilaha ang mga alahas.

Mopresentar sila og certification gikan sa University of San Carlos (USC) nga si Vicente H. Tan, 88, usa ka graduate sa tunghaan nga magmatuod nga iyaha ang class ring nga napalgan uban sa mga alahas.

Have something to report? Tell us in text, photos or videos.

Bisan ang kapulisan nakakompirmar gikan sa tunghaan nga si Tan nigraduwar sa mao nga tunghaan.

Si Inocencio de la Cerna, abogado sa pamilya ug maoy namaba, niingon nga si Tan di na makahinumdom kon iya bang nalabay ang iyang class ring.

Matod niya nga ang negusyante gipailawom og head surgery human sa usa ka aksidente mga duha ka tuig na ang nakalabay.

Mao sab kini ang hinungdan nga usahay di na magkadimao ang mga estorya niini.

Apan ang iyang asawa ug mga anak mosaksi nga ila ang mga alahas nga napalgan sa mga basurero sa dumpsite niadtong Enero 12, 2012.

Nidugang si de la Serna nga si Tan dunay lawak diin iyang gipanghipos ang iyang mga alahas ug niadtong higayuna limtanon na ang negusyante.

Mga aparador nga gibutangan sa mga alahas gianay hinungdan nga nimando kini nga ipakanaog kini.

Wa mahibawo si Tan nga gisunog sa katabang ang mga aparador. Ang katabang wa makahibawo nga didto sa sulod ang mga alahas.

Ang mga tipaka gidala niini sa gawas aron kuhaon sa mga garbage collector, dugang ni de la Serna.

Samtang ang mga basurero nga nakapag sa mga alahas nabalaka nga duna silay tulubagon sa balaod ug makabayad sila sa nabaligya ug naprenda nang mga alahas.

Apan si de la Serna niingon nga ang banay nga Tan igo rang mokuha sa nahabiling mga alahas.

Di na kini mogukod pa niadtong mga basurero nga nakapahimus sa kuwarta kay ang importante nga mahibalik kini kanila.

Si Chief Insp. Anthony Bastes, hepe sa Investigation Detective Management Branch (IDMB) sa Mandaue City Police Office (MCPO) niingon nga naestorya sa iyang mga sakop ang pamilya ni Tan ug si Vicente mismo apan ang class ring lang maoy unang giangkon niini nga iyaha.

Samtang si Insp. Ramil Morpos, deputy chief sa IDMB, niingon nga ilang nakompirmar sa USC graduwado si Vicente Tan sa maong tunghaan ug iya gyod ang maong class ring kay nigradwar sa B.S. Commerce niadtong 1952.

Ang kapulisan magpadayon gihapon sa ilang imbestigasyon kon unsang hitaboa nga naabot sa basurahan ang maong mga alahas.

Gitug-an usab ni Morpos nga lakip sa nipakisayod sa maong mga alahas ang representante sa M-Lhuillier sa pagsuta kon di ba kini apil sa mga alahas nga natulis sa miaging tuig.

Si Morpos niingon nga andam nilang itugyan ang mga alahas ngadto sa pamilyang Tan basta makapakita kini og kamatuoran nga ila ang maong mga butang.

Ang mga alahas gitugyan sa kapulisan ngadto kang Mayor Jonas Cortes. dugang taho sa Sun.Star Cebu