Mga Tan maghuwat og 2 ka semana sa alahas

Friday, January 20, 2012

MGA alahas nga nakit-an sa mga basurero sa Umapad dumpsite dakbayan sa Mandaue wa makuha sa pamilyang Tan kagahapon human kini gitugyan sa kapulisan ngadto kang Mandaue City Mayor Jonas Cortes.

Apan andam silang mohuwat og duha ka mga semana aron masunod ang gimbut-an sa balaod labot sa nakit-ang mga butang.

Have something to report? Tell us in text, photos or videos.

Kagahapon sa buntag, ang pamilyang Tan uban sa ilang abogado, niadto sa Mandaue City Hall dala ang mga affidavit aron unta pagkuha sa mga alahas.

Apan kagahapon usab sa buntag, ang kapulisan sa Mandaue pinangulohan sa hepe sa Investigation Detective Management Branch (IDMB) pormal na nga ning-turnover sa nakit-ang mga alahas ngadto kang aron mao nay mokustodiya ug mohukom unsay buhaton niini.

Kini gisaksihan nila ni City Legal Officers Giovanni Tianero ug Jamal Calipayan.

Sila si IDMB chief, Chief Insp. Michael Bastes ug Theft and Robbery Section chief , Chief, Insp. Ramil Morpos, maoy ningtunol sa mga alahas ug sa P36,500 nga nahabiling halin sa gi-prendang bracelet sa basurerong nakakita nga si Rodrigo Corta.

Matod ni Cortes nga sundon gyud nila ang anaa sa balaod nga gikinahanglan una ang duha ka semanang pagpublikar sa mga publikong dapit ug sa mga lokal nga mantalaan nga adunay nakit-ang mga alahas nga anaa karon sa custody sa mayor.

Samtang kadtong buot mo-claim sa maong butang kinahanglang makapakita og kamatuoran sa mga dokumento aron pagmatuod nga ila gyud ang maong butang.

Ang pamilyang Tan inubanan, sa ilang abogado, Atty. Inocencio dela Cerna, niabot usab sa Mandaue City Hall human sa pormal nga turnover aron unta sa pagkuha sa mga alahas ug pagpakita’g affidavit of ownership ngadto sa mayor.

Apan, gitug-an ni dela Cerna nga gisultihan sila sa mayor nga gikinahanglan una nila sundon ang two-week publication alang usab sa mga kadtong buot mo-claim sa mga alahas.

Ang mga alahas giingong gipanag-iya sa magpapatigayong Vicente Tan, nga tag-iya sa Inday’s Dried Mangoes ug Chekito Bazar.

Usa sa mga alahas nga mao ang class ring aduna pay nakakulit nga ngan ni Tan nga nigraduwar sa University of San Carlos (USC).

Si Tan niadto usab duol sa City Hall inubanan sa iyang pamilya aron unta sa pagkuha.

Matod ni dela Cerna, nga ulahi na nga nahibaw-an sa pamilya nga ila gyud kadto tungod kay adunay memory gap si tan human gioperahan sa ulo sa miaging tuig, samtang ang iyang asawa adunay Alzheimer’s disease.