3 nangapaso; 2 niini magtiayon

Monday, January 23, 2012

TULO ka mga tawo ang nangaangol sa managlahing mga insidente kagahapon sa buntag, duha niini mao ang magtiayon, kinsang balay naugdaw sa sunog.

Ang retiradong sundawo nga paralisado ug ang sa iyang asawa nangapaso sa pagkasunog sa ilang giabangan nga balay sa Sityo Mango Groove, Barangay Basak San Nicolas, Dakbayan sa Sugbo.

Have something to report? Tell us in text, photos or videos.

Katol kontra sa lamok ang gitumbok nga sinugdanan, apan ang ilang silingan miinsister nga nagdaob sulod sa ilang balay ang asawa.

Ang mga biktimang ningdangat sa tambalanan tungod sa mga paso giilang mao sila si Loreto ug Alejo Restauro, pulos kapin sa 50 anyos ang panuigon.

Si Loreto nakaangkon og paso halos sa tibuok niyang lawas, samtang si Alejo napaso sa iyang mga bukton ug nawong samtang niluwas sa iyang bana.

Sigun sa pamahayag ni Alejo nga gikahinabi sa mga tigbalita nga nahibung na lang siya nga sa iyang pagsulod sa kwarto nidalaab ang kayo ilawom sa katre nga gihigdaan sa iyang bana.

Bisan pa man kon nagdilaab ang kayo, iya kining gibunlot ug giguyod paingon sa gawas sa balay nga ilang giabangan nga gipanag-iya ni Rosemarie Uy.

Tungod sa pagsalbar sa iyang bana, nakaangkon ang asawa og mga paso sa iyang mga bukton ug nawong.

Apan si Arturo Fernandez, iyang silingan ug tupad ang balay, niingon nga di sila makatuo nga kini nagagumikan sa katol.

Sila nagduda nga kini nagagumikan sa kanunay nga pagdaob ni Alejo sulod sa ilang balay.

“Amo na na sila gibadlong nga dili magdaob sulod sa bay. Nahitabo na man sa una nga nasunog. Maayo na lang kay natabang sa mga silingan. Karon wa na gyud mabantaye ug maluwas sa silingan,” matod ni Fernandez.

Niingon si Fernandez nga makasugat lang og away si Alejo sa iyang mga silingan kay masuko nga badlungon ug mangisog.

Ang alarma nadawat sa kabomberohan alas 7:27 sa buntag ug nakontrolar sulod sa dos minutos sa pagsugod nilang kombate sa kayo. Kini nagbilin og danyos nga P45,000.

Paglabay sa pipila ka mga oras, usa na usab ka tawo ang nakaangkon og third degree burns sa lawas human makuryentihi sa nasaghiran niyang live wire.

Nahitabo kini sa usa ka dos andanas nga edipisyo sa may dan B. Rodriguez, ning siyudad samtang namintal ang pintor nga si Jovel Pataytay, 24, lumad nga taga lungsod sa San Fernando, Sugbo pasado alas 10 kagahapon sa buntag.

Wa gyuy nasayod sa nahitabo kaniya, apan maayo na lang kay nakit-an siya ni Allan Limotan, 41, nga padung unta sa Tres de Abril, nga hapit na mahulog sa atop.

Kini human ang iyang kahoy nga gigamit sa pagpamintal aksidenteng
nasabod sa live wire.

Dugang ni Limotan nga sa pag-agi niya sa maong dapit naluoy siya nga nakakita kang Pataytay hinungdan nga gidali niya sa pagsaka ug gihuboan sa iyang mga sapot tungod kay nagkayo na ang tibuok lawas niini.