Paglaum: panawagan ni Palma

Sunday, January 29, 2012

NANAWAGAN si Cebu Archbishop Jose Palma sa mga lider sa Simbahang Katoliko nga maghatag og paglaom sa katawhan sa nasod nga gisamok sa mga kalamidad, suliran sa katilingban ug kagubot sa pulitika.

Mao kini ang gipalanog nga mensahe ni Palma kinsa mao usab ang presidente sa Catholic Bishops Conference of the Philippines atol sa iyang pagpamulong sa pagbukas sa ika-104th CBCP plenary assembly sa Pope Pius XII Center sa Manila.

Have something to report? Tell us in text, photos or videos.

Gihisgutan sa kalihukan ang mga isyu bahin sa simbahan ug ubang nasudnong isyu nga dunay kalabutan ang katawhan sa nasod.

Gitambungan kini og kapin sa 100 ka mga Obispo nga gikan sa nagkadaiyang bahin sa nasod nga gisugdan niadtong Sabado ug matapos karong adlawa.

Apil sa nitambong ang Papal nuncio Archbishop Guiseppe Pinto, Manila Archbishop Luis Antonio Tagle ug Cebu Archbishop Emeritus Ricardo Cardinal Vidal.

Si Palma niawhag sa iyang kaubanang Obispo nga dasigon ang mga tawo nga dunay paglaom nga nagpaabot taliwa sa mga pag-antos ug kalisod nga naagian.

“As bishops, we are to give people a reason for living and hoping... It is not a wishful thinking but a well-grounded hope when we expect of blessings and good things to come,” mensahe sa arsobispo ngadto sa iyang kaubanan atol sa maong kalihukan nga gi-post sa website sa CBCP.

Ang maong opisyal sa simbahang Katoliko nilakbit usab og saysay sa grabing katalag-man nga niigo sa Iligan, Cagayan de Oro ug Dumaguete diin liboan ka mga tawo ang nangamatay ug nawagtangan og kapuy-an gumikan sa bagyong Sendong niadtong Disyembre sa miaging tuig.

Gawas sa mga kalamidad, nag-antos usab ang mga Pinoy sa suliran sa graft and corruption, kakuwang og mga trabaho ug wa masumpo nga pagguba sa kinaiyahan sama sa kalasangan ug kadagatan nga nisangpot sa kalisod sa mga tawo.

Iya usab gihisgutan ang kasungian sa mga opisyal sa managlahi nga sanga sa kagamhanan nga matod niya dili unta kita matanggong sa paggukod sa sad-an nga opisyal kondili mopadayon kita ug magtinabangay ang usag-usa alang sa pagpatuman sa mga balaod ug programa nga maghatag og kalamboan.

Ang iyang gipasabot mao ang away tali sa Aquino administration ug Supreme Court Chief Justice Renato Corona diin nasugdan na ang impeachment trial sa hawanan sa Senado.

“Given the above agenda, we know we are given hope, trustworthy hope. Hence we can face our present even it it is arduous; our present can be lived and accepted because it leads to a goal,” dugang ni Palma.

Mao kini ang labing unang plenary assembly nga gipangulohan ni Palma sukad siya nahimong presidente sa CBCP niadtong Disyembre sa miaging tuig.