2 gipatay sa dakbayan sa Carcar

Friday, February 3, 2012

DUHA ka mga tawo ang gipangpatay sa dakbayan sa Carcar sa miaging adlaw, usa ang gibunalan ug laing usa ang gipusil.

Gibunalan sa replica nga kahoy nga rifle ang ulo ug kalaw sa tiguwang mag-uuma hangtud namatay samtang natulog uban sa iyang asawa sulod sa ilang panimalay sa miaging gabii sa bukirang dapit sa Sitio Puesto, Barangay Napo, dakbayan sa Carcar.

Have something to report? Tell us in text, photos or videos.

Si Marcelino Navares, 86, mag-uuma namatay dihang naabtan sa iyang mga anak ug paryente, silingan sulod sa ilang panimalay uban sa iyang asawang si Segunda, 86.

Si PO2 Rocendo Binondo, imbestigador sa Carcar Police, niingon nga ang biktima natulog na mga alas 10:00 sa miaging gabii uban sa iyang asawang si Segunda.

Kalit lang nakasulod sa ilang panimalay ang wala mailhing suspek ug gibunalbunalan ang biktima sa nagkadaiyang parte sa lawas hangtud nga namatay.

Si PO2 Binondo, niingon nga gibilin didto sa crime scene ang kahoy nga rifle nga nagkadugo nga gigamit sa krimen nga sa pagkakaron naa sa police station.

Ang mga anak walay nahibaw-an nga dunay kaaway ang ilang mga ginikanan diha sa maong lugar hinungdan nga naglibog sila nganong gipatay.

Samtang, usa ka drayber sa habalhabal ang gipusil-patay sa duha ka wala mailhing tawo nga nagsakay sa motorsiklo dihang iyang gikuha ang iyang igsuon babaye sa miaging hapon sa Sitio Pangpang Akob, Branga Velencia, Carcar.

Si Frederick Pansit, 30, ulitawo nagpuyo sa Sitio Danao sa nahisgutang Barangay dead-on-arrival (DOA) sa Carcar District Hospital human naigo sa iyang ulo.

Si PO2 Binondo, niingon nga gikan sa merkado publiko ang biktima sa dakbayan sa Carcar, nagkuha sa iyang maguwang babaye nga si Gladys Mae, 40, dalaga nga nagtrabaho sa usa ka parlor.