Barangay kapitan sa Calamba, pildi sa election protest

Friday, February 3, 2012

GIPROKLAMAR sa korte si Ester Concha nga maoy nidaog nga barangay kapitan sa piniliay sa barangay ug Sangguniang Kabataan (SK) niadtong 2010 sa Barangay Calamba, dakbayan sa Sugbo.

Ang desisyon nga gipakanaog ni Municipal Trial Court in Cities (MTCC) Branch 1 Judge Monalila Tecson kagahapon nagtumbok nga si Concha nilabaw og 39 botos batok sa naglingkod karong si Calamba Barangay Kapitan Victor Quijano.

Have something to report? Tell us in text, photos or videos.

Si Carlo Fortuna, abogado ni Quijano, nipahibawo nga mosang-at silag motion for reconsideration sa napakanaog nga desisyon sa korte.

Apan, si Fortuna nihangyo sa korte kagahapon nga ilangay unta ang pagpapakanaog sa desisyon kay nisang-at silag petition for certiorari sa Korte Suprema niadtong Lunes ug buot silang huwaton ang hukom niini.

Wa motugot ang korte sa hangyo sa kampo ni Quijano kay nakadawat silag kamanduan gikan sa Commission on Election (Comelec) en banc nga ipakanaog na ang desisyon sa protesta nga gisang-at ni Concha.

Nalatid sa desisyon sa korte nga gipetsahan niadtong Abril 25, 2011 nga dihang giusab sa pag-ihap ang resulta sa eleksyon sa Calamba nasuta nga si Concha nakaangkon og 2,539 botos samtang si Quijano nakakuhag 2,500 botos.