Pirma sa recall election sa Danao

Friday, February 3, 2012

NAG-UMOL na og lima ka komitiba ang Commission on Elections (Comelec) sa dakbayan sa Danao sa pagpahigayon og verification sa mga pirma nga gipasukip sa recall petition batok ni Mayor Ramon “Boy” Durano Jr., nga gipasaka sa iyang manghod nga si Bise Mayor Ramon “Nito” Durano III ug mga sakop sa konseho.

Si Comelec Deputy Executive Director for Operations Bartolome Sinocruz Jr. nimando sa Comelec sa Danao City nga sugdan ang verification, siyam ka adlaw gikan sa pagdawat sa resolusyon sa Presidential Electoral Tribunal.

Have something to report? Tell us in text, photos or videos.

Sa resolusyon sa PET nga pinetsahan og Enero 17, 2012, kini nagtugot sa hangyo sa Comelec Danao nga mogamit sa Book of Voters o List of Voters with Voting Records sa maong dakbayan sa pagpahigayon og verification.

Kinahanglang permiso sa PET tungod sa kamandoan niini pagpreserba sa voters list ug voting records sa tibuok nasud gumikan sa nag-ung-ong nga protesta nga gipasaka sa pilderong vice presidential candidate Mar Roxas batok ni Bise Pres. Jejomar Binay.

Si Atty. Lionel Marco Castillano, provincial election supervisor sa lalawigan sa Sugbo sa nipahibawo nga sa Pebrero 13 na masugdan ang verification ug matapos sa Pebrero 23, sanglit Dominggo ang Pebrero 22.

Matod niya nga kapin sa 29,000 ka mga pirma nga gipasukip sa recall petition ang ilang nasuhid ug 12,000 lang ka mga pirma ang gikinahanglan para mapahigayon ang recall election batok sa mayor.

Sa verification process, susihon sa Comelec kon iya ba gyud sa botante nga nipirma ang pirma nga gipalakip sa petition.

Human niini, mohimo og report si Danao City election officer Atty. Dominic Ian Marigomen ug isumitir sa buhatan ni Sinocruz nga mao nay moduso niini ngadto sa Comelec en banc.