Gipusil sa pulis, patay

Sunday, February 5, 2012

TUNGOD lang kay giingnan nga “pulis walay hinungdan”, usa ka pulis sa dakbayan sa Mandaue ang nipusil-patay sa iyang silingan sa Sitio San Vicente Ferrer, Mandaue, pasado alas 4:00 sa hapon kagahapon

Usa ka 4-anyos nga bata ang angol human napagan sa bala sa pistola nga nilapos sa kuwarto sa balay.

Have something to report? Tell us in text, photos or videos.

Sumala sa taho, ang duha nag-inom sa wala pa nahitabo ang insidente. Ang biktima nitabang pagtrabaho sa balay sa pulis.

Ang biktima giila nga si Remegio Iran, 42, minyo, ug molupyo sa samang dapit.

Ang napagan nga bata mao si Kenjie Takuto, 4.

Ang suspek mao si PO2 Rosendo Cabrera, molupyo sa samang dapit ug sakop sa Station-1 apan nadistino sa beat patrol.

Gikataho nga 22 na ka tuig siya sa serbisyo ug dunay upat ka mga anak.

Base sa imbestigasyon sa Homicide section nga atol sa hitabo, nag-inom ang duha sa usa ka tindahan nga dili layo sa balay sa biktima.

Sa dihang nahubog, nahitabo ang ilang mainit nga panaglalis hinungdan nga niuli ang pulis sa ilang balay ug sa pagbalik, dala na ang iyang armas nga kalibre .45 ug dayog pusil sa biktima sa makadaghang higayon.

Hinungdan nga naigo kini sa ulo ug nagkadaiyang bahin sa lawas nga niresulta sa pagkamatay dihadiha samtang ang bata nga didto duol sa hitabo naigo ang iyang tuong tiil sa pisik sa bala ug daling gidala sa Mandaue District Hospital.

Ang gikatahapan nga pulis nga nasugatan pa sa kapulisan nga nitubag sa alarma mao pay nipahibawo sa kapulisan nga adunay napusilan.

Sa gihimong hot pursuit operation sa mga sakop sa Station-3 pinangulohan ni Insp Wilson Abot didto na nila masakpi si PO2 Cabrera sa Barangay Mantuyong.

Sa liquor test sa suspek, positibo kini nga hubog ug niangkon usab sa krimen nga iyang nahimo.

“Niingon man sab ba nga pulis walay hinungdan morag bati sab matandog sab atong ego ana,” asoy ni P02 Cabrera.

Samtang, naniguro na lang usab siya ug iya na lang kining giunhan tungod kay nihana man usab kining bunot sa hawak, apan ang homicide walay nakuhang armas gikan sa biktima.

Nakuha gikan sa crime scene ang unom ka kabhang, usa ka slug sa kalibre .45, ug ang armas nga gigamit ni PO2 Cabrera, dugang nasayran sa kapulisan nga ang duha aduna nay away kaniadto apan nahilot ra usab.

Si Chief Insp. Elmer Fernandez hepe sa Station-1 miingon nga walay record ang maong pulis sukad kini nadistino diha sa iyang buhatan, apan kon nakasala man kini dili siya molaban ug gikinahanglan nga iyang atubangon ang kaso nga ipasaka batok sa iyang sakop.

Ang gikatahapan gitanggong sa Station-2 ug wala pa makatino ang kapulisan kon unsa nga kaso ang ilang ipasaka.