Klase balik na

Tuesday, February 7, 2012

BALIK na sa normal ang klase karong adlawa sa mga pampublikong tunghaan sa Central Visayas gawas lang sa mga lugar nga grabeng naapektuhan sa linog, matod sa Department of Education.

Si DepEd acting regional director Dr. Carmelita Dulangon nagkanayon nga gisuspenso ang mga klase sugod niadtong Lunes hangtod kagahapon, aron makahigayon ang mga principal ug magtutudlo pag-inspeksiyon kon duna bay nangaliki sa ilang mga classrooms o paril nga magdala og hulga sa mga tinun-an.

Have something to report? Tell us in text, photos or videos.

Matod niya nga mahinungdanon nga matan-aw ang structural ug architectural damage sa mga classrooms ug school building aron mahimoan dayon og aksiyon sa ilang central office.

Iyang giawhag ang mga school officials nga makig-alayon sa mga local government units aron sila matabangan.

Kagahapon, dunay mga bata nga nakaadto gyud sa mga eskwelahan sa dakbayan sa Sugbo human namahayag si Cebu City Schools Division Superintendent Dr. Rhea Mar Angtud nga wa na gisuspenso ang klase.

Apan depensa ni Angtud nga miscommunication lang ang nahitabo tungod kay ulahi na nadawat sa iyang buhatan ang abiso gikan sa regional office nga nagsuspenso sa klase.

Si Dulangon niingon nga ilang gi-authorize ang mga principal ug superintendent nga mosuspenso og klase kon makita gyud niini nga nameligro ang kahimtang sa ilang mga estudyante labi didto sa Negros Oriental nga grabeng naapektuhan sa linog.

Iyang giawhag ang kadagkuang mga opisyal sa mga public schools nga magpalit og radyo para sa mamonitor ang mga panghitabo sama sa ilang gibuhat sa regional office.

Siya nidugang nahibaw-an niya ang mga nahitabo sa Negros Oriental matag oras gumikan sa iyang kanunay nga pagmonitor sa radyo ug telebisyon.