75 ka kusog nga aftershocks natala

Wednesday, February 8, 2012

SUBLING gipasabot sa Philippine Institute of Volcanology and Seismology (Philvolcs) nga wa pay instrumento nga naimbento nga motag-an sa umaabot nga linog nga moigo sa bisan asang dapit sa kalibutan.

Ila kining giluwatan nga pamahayag taliwa sa mga text messages nga nanghadlok pinaagi kunohay sa pagkutlo sa ilang buhatan nga nagpahibawo nga dunay kusog nga linog nga moigo na sab.

Have something to report? Tell us in text, photos or videos.

Usa sa mga text message nagtumbok nga dunay intensity 8 nga linog nga motay-og sa Sugbo alas 8 sa gabii niadtong Martes.

Kini samtang niabot na og 1,239 ka aftershocks ang natala sa Phivolcs hangtod sa alas 10:30 kagahapon sa buntag.

Niini, moabot og 75 ka aftershocks ang kusog nga nasinati sa katawhan, lakip na dinhi sa Sugbo.

Daghang mga Sugboanon ang nahigmata sa ilang pagkatulog tungod sa mga pagtay-og atol sa kagabhion ug kagahapon sa kaadlawon.

“Wala pa intawoy instrument nga capable sa pag-predict sa earthquake oy,” matod pa ni Rolando Montañez, Science Research Specialist sa Philvolcs Mactan.

Nipasabot siya nga ang seismograph diha sa ilang buhatan igo lang mo-detect sa gikusgon sa pagtay-og sa linog.

Hinuon iyang giklaro nga di na angay nga mabalaka ang katawhan kay hinay na ang mapaabot nga aftershocks samtang nag-settle na ang fault.

Sa laing bahin, ang House Committee on National Defense nakigtagbo kagahapon sa mga opisyal sa Disaster Risk Management diin gihisgutan ang ‘state of government response to recent calamities’ ilabi na nga mi-igo ang 6.9 magnitude nga linog sa Negros Oriental nga naka-apekto sa habagatang bahin sa lalawigan sa Sugbo niadtong Lunes.

Samtang si Cebu 6th District representative Luigi Quisumbing, vice chairman sa Committee on National Defense sa Ubos Balay Balaoranan, nisugyot nga gikinahanglan ang updated nga geo-hazard maps nga maggiya sa publiko sa pag-ila niadtong disaster prone areas.

Gitug-an ni Quisumbing nga nakita niya ang dakong panginahanglan sa pag-improve sa disaster risk reduction sa nasud ug gikihanglan ang pakig-alayon sa mga hingtungdan nga ahensiya nga naglakip sa National Disaster Risk Reduction Management Council, Office of Civil Defense, Philvolcs ug uban pa.