Dalaga gilingla pinaagi sa Facebook, gidunggab

Wednesday, February 8, 2012

DALAGA gidunggab sa iyang kanhi uyab nga iyang gibuwagan, apan nigamit og alias sa Facebook aron sila magkahigala ug magkita.

Tuod man, nilampos ang plano sa suspek nga si Glen (di tinuod niyang ngan), 16, kay nagkita gyud sila sa mia­ging gabii sa biktimang si Maricel Niere, 18, helper sa balay, sa Sityo Upper Son-oc, Nivel Hills, Brgy. Lahug, dakbayan sa Sugbo.

Have something to report? Tell us in text, photos or videos.

Apan nahimong duguon ang ilang panagkita kay dihang nihangyo na ang suspek sa biktima nga mag-uli sila, gibalibaran siya sa dalaga hinungdan nga iyang gi­dunggab sa makadaghan.

Naigo sa nagkadaiyang parte sa iyang lawas si Niere, taga Sabang, lungsod sa Sibonga, sa pagdunggab ni Glen, taga dan Tupas, Sawang Calero ning siyudad.

Matod ni PO3 Geofrey Gutual sa Homicide Section nagbutyag nga nigawas sa balay ang biktima aron makigkita sa iyang higala nga naila-ila pinaagi sa Facebook.

Pag-abot niya sa lu­gar, kalit lang nigawas ang suspek ug nigakos kaniya nga nagpakiluoy nga di siya buwagan.

Apan nikisi-kisi ang biktima ug gibalibaran ang suspek.

Sa kasuko sa suspek, nilanit kini sa iyang kut­silyo nga gidala ug gi­dunggab sa makadaghan ang biktima.

Bisan kon samaron, nakalingkawas ang biktima, nidagan ug nisinggit kini og pakitabang nga maoy nakahatag og atensyon sa mga tawo sa palibot.

Wa na mogukod ang suspek tungod sa ka­dag­han na sa mga tawo.

Ang biktima nakadagan ngadto sa balay ni Russian Honorary Consul Armi Gar­cia nga mao nay nidala kaniya sa tambalanan.

Ang suspek, wa magdugay, nitahan ngadto kang PO1 Raffy Quandot sa Traffic Division nga nagpuyo sa maong lugar.

Nabawi gikan kaniya ang kutsilyo nga iyang gigamit sa pagdunggab.

Dugang nasayran sa kapolisan nga sukad pa sa miaging buwan gibuwagan sa biktima ang suspek.

Ang suspek nigamit og alyas nga ngalan sa iyang pagpakighigala sa biktima sa Facebook.