Haya gibiyaan tungod sa tsunami

Wednesday, February 8, 2012

GIBIYAAN sa mga kabanay ang haya sa usa ka taga Brgy. Apas nga padulong na untang ilubong sa sam-ang sa Sityo Cabantan, Barangay Luz, dakbayan sa Sugbo gumikan sa false alarm nga adunay tsunami niadtong Lunes.

Si Konsehal Alan Majait sa Barangay Apas nitung-an sa Sun.Star Superbalita nga iyang residente namatay ug gihatod ngadto sa sementeryo.

Have something to report? Tell us in text, photos or videos.

Apan samtang diha na sa sementeryo sa Cabantan ang mga kabanay ug silingan mga pasado alas 2 kapin sa hapon, nahitabo ang kagubot sa palibot tungod sa giingong tsunami nga nagsingabot.

Nasayran sa mga naghatod nga ang tubig naa na sa Brgy. Mabolo.

Sa way daghang langan, nibulhot og panagan ang mga nanghatod paingon sa taas nga lugar sa dakbayan.

Hinuon si Majait nagkanayon nga nalubong ra sab ang patay human nasayran nga usa ra diay ka false alarm.

Ang mga tawo gikan sa mga coastal barangay sa dakbayan naabot og panagan ngadto sa barangay Poblacion Pardo, Guadalupe, Abellana National School, Fuente Osmeña, Guadalupe, Capitol Site ug Busay.

Ang tsunami scare nakapakgang sa dagan sa rapiko ug nakahikling sa dul-an sa usa ka libo ka mga individual nga wa mobalik sa ilang tagsa-tagsa ka balay gumikan sa paniguro.