Siren sa bombero di tungod sa tsunami: Comar

Wednesday, February 8, 2012

CEBU CITY fire marshal nanalipod sa iyang mga tawo nga nag-siren di tungod sa tsunami, kon di sa alarma sa sunog niadtong sayong hapon sa Lunes.

Ang pag-siren sa mga bombero maoy usa sa gitumbok nga hinungdan nga daghang mga tawo ang nangaratol ug nanagan dihang dunay nagpahibawo nga dunay tsunami nga nagpadung mga alas 2 pasado sa hapon niadtong Lunes.

Have something to report? Tell us in text, photos or videos.

Ang kusog nga pag-siren sa kabomberohan gituohan sa katawhan nga maoy senyales nga magbantay o warning kay dunay nagsingabot nga tsunami.

Apan si Cebu City Fire Marshal Aderson Comar niingon nga di sila angay nga basulon sa karatol sa mga tawo human madungog ang siren tungod kay niadtong higayona may nadawat sila nga alarma sa kabomberohan nga adunay sunog sa Labangon.

Matod pa ni Comar nga naatol lang sa ilang pag-siren aron pagtubag sa alarma dihang dunay lalake nga nagsakay sa motorsiklo nga nisinggit nga adunay tsunami.

“Ang mga tawo nagtuo nga warning o alert siren na to siya kay natayming man nga dihay nagdinaganay kay dunay tsunami,” dugang ni Comar.

Sigun sa record gikan sa base control sa Cebu City Fire Department, ang alarma nadawat alas 2:20 sa hapon.

Ang caller giilang mao si Norman Gabatid, school principal sa elementary school.

Tungod sa alarma, gitawagan sa base control ang mga sub station lakip na ang fire central sa pagresponde hinungdan nga nanggawas ang mga bombero nga nag-siren.

Apan samtang wa pa sila moabot sa dapit, ang shift supervisor nga si Victor Mercado mitawag sa mga bombero alas 2:26 sa hapon nga pabalikon sila sa fire station kay napawong ra ang kayo.