Gikiha tungod sa tsunami

Friday, February 10, 2012

GIPASAKAHAN nag kaso kagahapon sa piska­liya sa dakbayan sa Sug­bo ang usa ka radio an­­nouncer tungod sa giingong siyay hinungdan nga nag-panic ang mga tawo niadtong Lunes kay nagsinggit nga dunay tsunami.

Ang City Intelligence Branch (CIB) ubos sa Cebu City Police Office (CPPO) ang nipasakag kaso batok kang Danilo Cogtas, molupyo sa Sitio Kalmar, Barangay Lawaan II, dakbayan sa Talisay, nga giingong nakalapas sa Article 153 sa Revised Penal nga nalatid ang Tumults and Other Disturbances of Public Order.

Have something to report? Tell us in text, photos or videos.

Apan, si Cogtas nihimakak na nga siyay nagsinggit nga adunay tsunami sa mga molupyo sa kabarangayan nga nahimutang sa mga baybayon sa dakbayan sa Sugbo.

Wa gilakip si Ermita Barangay Konsehal Domingo Ando Jr. diin lakip usab siyang gipatawag sa kapulisan uban kang Cogtas niadtong miaging adlaw.

Duha ka mga habal-habal driver nga silang Roldan Espina, 44, ug Ryan Pedrosa, 27, pulos mga molupyo sa Laguerta, Barangay Lahug, dakbayan sa Sugbo, ang nisumiter og joint affidavit nga nagtumbok kang Cogtas nga ilang nakit-an nga nagsiyagit nga dunay tsunami niadtong hapon sa Pebrero 6 human sa linog sa Sugbo.

Nisaysay ang duha nga samtang naghuwat silag mga pasahero sa JY Square human niigo ang linog, nakadungog sila sa ilang mga pasahero nga may tsunami alert nga gipakanaog ang mga awtoridad.

Bisan sa naasoyng alert, padayon silang nagpasakay og mga pasahero apan mga alas dos sa hapon nabantayan nilang ang mga tawo nanggawas sa building ug kabalayan ug nipaingon ngadto sa Busay ug taas nga bahin sa Lahug.

Sa higayon nga mangutana silag unsay nahitabo, parehang mga tubag ang ilang madunggan busa sa ilang kakuryuso uban sa ubang mga habal-habal driver, niadto sila sa may Pasil aron matino kon duna ba gyoy tsunami.

Nilungtad og mga 10 minutos ang ilang pagbiyahe sa Pasil fish port gikan sa JY Square diin ilang nakit-an nila ang ubang mga tawo nga nagpalayo sa dapit kuyog ang ilang mga anak.

Samtang, nagmaneho sila sa ilang motorsiklo, nakakita silag tawo nga nagmotorsiklo usab ang nagsiyagit nga nagpadung na ang tsunami.

Ang naasoyng tawo nga nagsul-ob og dakong ID unya nagsul-ob nig itom nga sleeveless vest nga maoy isul-ob sa mga sakop sa media.

Tungod sa gisiyagit sa naasoyng tawo, nibalik sila sa agi paingon sa JY Square diin nakita nila ang bagang duot sa mga tawo nga nagdagan nga nangitag taas nga mga dapit nga ilang maestaran.

Niadtong higayona, wa sila mahadlok ilabi nang layo ra ang ilang balay sa baybayon apan gipakalma nila ang ilang tagsa-tagsa ka mga pamilya kay nakita man nila ang dagat didto sa Pasil nga malinawon ug way tsunami.

Nitataw silang Espina ug Pedrosa nga gisundan nila ang estorya sa mga mantalaang tabloid diin ang kapulisan nangita sa duha ka mga tawo nga maoy responsable sa pagsiyagit nga dunay tsunami.

Dihang nipalit silag mantalaan kagahapon, ilang nakita ang hulagway niadtong tawo nga ilang nakit-an sa Pasil nga nagsul-ob og itom nga sleeveless vest ug may dakong ID kinsa nagsiyagit nga paingon ang tsunami. Ilang nasayran nga si Cogtas giimbitar sa kapulisan aron mo-esplikar kabahin sa insidente.

“After discussing between ourselves what to do and when we were both certain that Danilo Cogtas as printed in tabloids was the same man we saw in Pasil shouting tsunami because of his distinctive hair-style, we finally decided that we will report the matter to the police,” nagkanayon ang duha sa ilang joint affidavit.