Manganak, driver gipusil sa nagmotor

Saturday, February 11, 2012

DI matukib ang kakuyaw sa usa ka babayeng manganakay nga padung sa ospital kagahapon sa kaadlawon dihang gipamusil sila sa duha ka mga lalakeng nagmotorsiklo.
Ang mao nga mga lalake gituohang nangasuko dihang nagsige og busina ang taxi driver kay nagdali unta padung sa ospital tungod sa emergency hinungdan nga sila gipamusil kagahapon sa ala 1 sa kaadlawon sa South Road sa Brgy. Bulacao, dakbayan sa Sugbo.

Apan naigo gyud sa wala nga bahin sa iyang ulo ang biktimang giilang mao si Antonio Fernandez, 52, taga Tungkil, Minglanilla, driver sa Voyager taxi.

Have something to report? Tell us in text, photos or videos.

Sa pasiuna nga imbestigasyon nga gihimo nila ni PO3 Geofrey Gutual, PO3 Victor Ayuman ug PO2 Erwin Pequero sa Homicide Section nagbutyag nga misakay sa biktima ang usa ka mabdos nga babaye nga manganakay.

Kuyog sa babaye ang iyang mga ginikanan nga sila si Eduardo ug Miguela Sanchez gikan sa Minglanilla District Hospital aron unta magpahatod sa usa ka tambalanan sa siyudad sa Sugbo aron adto manganak.

Niadtong higayona, kusog ang pagpadagan sa biktima paingon sa siyudad samtang nag-on ang ha­zards lights timaan nga emergency ang ilang biyahe.

Nagsige usab og bosina si Fernandez aron makabantay ang ubang mga motorista nga emergency ang iyang biyahe.

Sa ilang pag-abot sa Bulacao, ilang nasundan ang usa ka motorsiklo nga gisakyan sa duha ka mga tawo.

Iya kining gisigihan pagbosina aron mopadaplin kay emergency unta.

Sa dihang nalabyan na sa biktima ang motorsiklo, kalit siyang gipusil sa backrider ug naigo ang wa nga bahin sa iyang pultahan.

Tungod sa iyang kahadlok ug kakurat, nipasirit sa pagpadagan si Fernandez apan giusban pusil pa siya makaduha ka mga higayon.

Naigo ang back windshield sa sakyanan ug maayong pagkabuak niini.

Ang usa ka bala maoy nakaigo sa biktima.

Nawagtangan siya sa control hangtod nga nabangga sila sa usa ka kahoy daplin sa dalan.

Samtang ang mabdos uban sa iyang mga ginikanan daling niduko ug ningtago sa sakyanan sa kahadlok nga maigo ug usban pa sila sa pagpusil.

Daling ningresponde ang mga barangay ranod sa Bulacao.

Daling nilang gidala si Fernandez sa Cebu City Medical Center (CCMC) ug ang mabdos nga babaye uban sa iyang mga ginikanan daling gidala sa Mother and Child Hospital diin didto kini nanganak.

Sila Fernandez u gang babayeng nanganak pulos na luwas sa delikado nga kahimtang sa tambalanan.

Nagtuo sila si Gutual nga nasuko ang mga gunman nga gisigihan og bosina sa taxi driver ang duha hinungdan nga namusil ang backride.

Sa pagsuwat ning taho, wa pa gyud mailhi ang duha.