Bansaybansay aron makaandam panahon sa linog

Sunday, February 12, 2012

TUNGOD sa grabeng kaguliyang nga nahitabo human sa pag-igo sa magnitude 6.9 nga linog sa niaging semana sa Sugbo ug silingang mga probinsya, ang konseho niawhag sa Cebu City Risk Reduction and Disaster Management Council (CCRRDMC) ug Association of Barangay Council sa pagpahugot ug pagbansay sa publiko kon unsaon pagpakalma ang mga tao panahon sa emerhensiya.

Si Konsehal Alvin Dizon pinaagi sa iyang resolution uban sa pagsuporta sa konseho pormal nga nidasig sa mga hingtungdang buhatan sa dakbayan may kalambigitan sa katalagman.

Have something to report? Tell us in text, photos or videos.

“To urge the CCRRDMC and ABC-Cebu City to heighten community disaster awareness initiatives at the barangay level in order to train the local populace about how to prepare for natural disasters and emergency.” matod ni Dizon.

Si Dizon nagkanayon nga gikinahanglan kaayo ang maong lakang sanglit ang Pilipinas nahimong duol sa Pacific Ocean Seismic Zone o ang gitawag nga Pacific Ring of Fire kansang mga dapit maoy sagad maigo og linog o pagbuto sa bulkan nga mahitabo sa baba sa Pacific Ocean.

Gihimong basehanan sa konsehal mao ang pagtay-og sa yuta niadtong Pebrero 6 nga niigo sa Cebu ug Negros Oriental kansang mga balay ug bukid nalumpag ug nidahili gumikan sa linog.

Matod pa ni Dizon nga kon mabansay ang mga residente sa dakbayan kon unsay himuon pag-abot sa emerhensiya di unta magkaguliyang sama sa nahitabo human sa linog.

Kahinumdoman nga na-panic ang katawhan dihang dunay nagsinggit singit og tsunami gumikan usab sa pahibawo nga giluwatan sa Philippine Institute of Volcanology and Seismology.