British national patay, baho nang nakaplagan

Sunday, February 12, 2012

TUNGOD sa baho, nadiskubre ang usa ka British national nga wala nay kinabuhi sulod sa lawak sa gipuy-ang balay sa Suico compound sa Barangay Tabok, dakbayan sa Mandaue niadtong Sabado sa gabii.

Ang namatay giila nga si Marvin Mould, 53, minyo, taga nasud sa Birtanya apan kasamtangang nagpuyo sa nahishgotang dapit.

Have something to report? Tell us in text, photos or videos.

Si Insp. Wilson Abot hepe sa Station-3, diin nasakop ang Tabok, nagkanayon nga niasoy ang mga silingan nga taudtaod na nga wala nila makita ang biktima nga migawas sa iyang balay.

Ug niadtong Sabado sa gabii, namatikdan nga adunay nanimaho gikan sa balay sa langyaw hinungdan nga gipugos kini sa mga silingan sa pagsulod ug nakurat sila sa ilang nakita wala nay kinabuhi ug hapit na magudta.

Base sa imbestigasyon sa kapulisan, si Mould nag-inusarang nianhi sa nasud niadtong Enero 16 ug giigong palahubog.

Ang lawas sa biktima naa karon gihaya sa Cebu Rolling Hills Memorial Chapel samtang nagpaabot ang awtoriad kon si kinsa ang mokuha sa patay o ba kaha ibalik kini sa ilang nasud.

Ang kapulisan walay nakitang foul play sa lawas ni Mould ug gituohang giatake kini sa sakit iyang sa kasingkasing.

Hinuon, gusto ni Insp. Abot nga ipaubos sa autopsy ang lawas langyaw aron matino gyu kon unsay namatyan niini.