Concha buot molingkod na isip kapitan sa Brgy. Calamba human midaug sa kaso

Sunday, February 12, 2012

ANG gideklarar sa korte nga maoy nidaog nga kapitan sa Barangay Calamba, dakbayan sa Sugbo pormal nga niawhag sa korte nga palingkuron na siya sa pwesto human nidaog siya pinaagi sa labaw nga 39 botos niadtong piniliay sa barangay niadtong 2010.

Si Esther Concha, pinaagi sa iyang abogadong si Delon Richel Urot, nisang-at og motion for execution pending appeal ug nihangyo kang Judge Monalila Tecson nga moisyog kamanduan nga magmando sa mga nagkadaiyang ahensya ug awtoridad nga ipatuman ang desisyon sa korte. “…The clear and unmistakable victory of the protestant by way of mere physical count of ballots could hardly be reversed on appeal,” nagkanayon ang mosyon ni Concha.

Have something to report? Tell us in text, photos or videos.

Niadtong Pebrero 3, si Tecson, nangulo sa Municipal Trial Court in Cities (MTCC) Branch 1, nihukom nga si Concha nidaog og 39 botos batok sa iyang kaatbang nga si Victor Quijano nga maoy nilingkod karong kapitan human sa piniliay niadtong 2010.

“In sum, after the revision and appreciation of all the contested ballots, the total votes garnered by (protestant Esther) Concha is 2,539, as against (protestee Victor) Quijano of 2,500 votes,” sumala sa huwes sa iyang desisyon.

Ang abogado ni Quijano nga si Carlo Fortuna nagkanayon nga moapelar sila sa desisyon sa korte ngadto sa Korte Suprema kay nitumbok siyang way hurisdiksyon ang korte nga modungog sa election protest.

Silang Concha ug Quijano nag-atbang niadtong Oktubre 2010 nga piniliya unya ang nahauna gideklarar nga mananaog pinaagi sa labaw nga 81 botos. Si Concha nisang-at og election protest ug nihangyo nga usbon pag-ihap ang mga botos.

Ang korte niihap pag-usab sa mga boto apan nahunong kini nunot sa petition for certiorari nga gisang-at ni Quijano sa Commission on Elections (Comelec) Ang kampo ni Quijano nipadayag nga may depekto sa gihimo ni Concha nga di mahimong makorihian.

Apan, ang Comelec en banc pinaagi kang Comelec Commissioner Sixto Brillantes Jr. nimando kang Tecson nga mopadayon sa pagdungog sa protesta ka yang petition for certiorari di mao nga pleading aron pagkwestyo sa depekto.

Nalatid sa desisyon sa korte nga ang resulta sa tabulation matag presinto nagpakita nga ang mga boto nilang Quijano ug Concha nisaka bisan nakuhaan sa mga “marked ballot”. Nimando usab ang korte nga si Quijano mobayad og P10,000 isip attorney’s fees ug P5,000 isip bayad sa paghusay sa kaso.

Nahimutang sa pleading ni Urot nga ang labaw nga boto ni Concha nga nakuha batok kang Quijano na-establisar nga ang iyang kliyente gyod ang nidaog.  

“Even before any appreciation of the objected and claimed ballots of the parties, the lead of the protestant over the protesteee has already been clearly established. There can be no argument against such mathematical counts of ballots,” said Urot.