Patrol car sa mga pulis, sibilyan na ang padraybon

Sunday, February 12, 2012

GIHANGOP sa hepe sa Cebu City Police Office (CCPO) ang lakang sa Cebu City Hall nga hulipan ang mga pulis nga nagmaneho sa ilang patrol car og civilian nga mga drayber.

Si S/Supt. Melvin Ramon Buenafe nihangop sa gihimo ni Mayor Michael Rama sanglit mapalapdan nila ang ilang kaakuhan ngadto sa publiko.

Have something to report? Tell us in text, photos or videos.

“ It is a welcome move and I am very grateful kay ma-maximize ang trabaho sa pulis” matod pang Buenafe.

Gihulagway ni Buenafe nga pinaagi sa paghulip sa mga pulis nga drayber sama ra nga gipun-an og mga pulis ang ilang tropa ug dako kining ikatabang hilabi na sa ilang anti-criminal operation.

Si Phillip Zafra, chief of staff ni Mayor Rama ug officer in-charge sa peace and order program sa dakbayan nagkanayon nga sugod karong adlawa adunay 19 ka empleyado sa Cebu City Hall gikan sa General Services Office nga maoy mohulip sa mga drayber nga pulis.

Ang CCPO adunay 15 ka mga patrol car gikan sa Mobile Patrol Group , 11 ka patrol car sa 11 sab ka police stations.

Si Zafra nipasabot nga 19 lang una ka organic personnel sa siyudad ang ilang gipada sanglit ang uban nga drayber gikinahanglan usab sa laing mga departamento sa City Hall.

Hinuon bisan paman sa paghulip sa civilian drayber sa mga patrol car wa gihapon kini magpasabot nga di na makamaneho ang mga pulis ilabi na panahon sa emerhensiya.

Sa nakalabay nga administrasyon adunay 38 ka mga civilian drayber ang gipapha sanglit gikataho nga makaimpluwensya kini sa mga pulis nga mangolekta og suborno .