Gwen way panahon sa date, manghatag og gifts sa lungsod

Monday, February 13, 2012

SAMA sa nangaging selebrasyon sa Valentine’s Day, saulogon ni Gobernador Gwen Garcia ang adlaw sa mga kasingkasing karong adlawa pinaagi sa pagpanghatag og mga proyekto, inagurasyon sa mga school buildings ug ayuda ngadto sa kalungsuran sa habagatang Sugbo.

Mao na kini ang nabatasan sa gobernador sukad sa iyang unang termino pagkagobernador sa lalawigan sa Sugbo.

Have something to report? Tell us in text, photos or videos.

Si Garcia nga gisukit-sukit sa mga tigbalita kon kinsa ang iyang ka-date sa Valentine’s Day, igo lang kini mikatawa og nagkanayon nga wala na siya’y panahon nga makig-date gumikan sa pagka busy sa iyang schedule ug sa kadaghan sa iyang trabahuonon.

“Bisan pa og duna pa gihapon pero wala lagi koy panahon. Wa koy panahon para ana kay daghan pa kog ubang trabahunon.” padayag sa gobernador atol sa press conference sa Kapitolyo kagahapon.

Sa pagsaulog sa adlaw sa mga kasingkasing, unang adtuon ni Garcia ang lungsod sa Dumanjug diin mang-apud-apod kini og insurance cards sa Philippine Crop Insurance Corporation sa gibanabana nga 700 ka mga mag-uuma ug mananagat.

Himuon usab sa lungsod ang distribusyon sa mga kanding, lakatan, camote seedlings, name trees, ug mga multicabs para sa pipila ka mga barangay. Makadawat usab sa ilang yearly allowance ang mga barangay ta­nod, ug barangay animal health aides sa Dumanjug.