Mag-Valentine’s Day sa bilanggoan

Monday, February 13, 2012

BESPIRAS sa Valentine’s Day, hapit gyud mapatay sa bana ang iyang asawa kagahapon sa buntag tungod sa grabeng pagselos niini sa lalake niyang silingan.

Samtang sila naglalis, nilanit og armas ang bana apan gisuwayan kini pag-ilog sa asawa hinungdan sa pagbuto nga nakaingon sa pagkaigo sa dunggan sa ginang kagahapon sa alas 11 sa udto sa Brgy. Panadtaran, lungsod sa San Fernando, Sugbo.

Have something to report? Tell us in text, photos or videos.

Si Joyce (di iyang tinuod nga ngan), 25, nakaangkog samad pinusilan sa tuong dungan ug nagpatambal sa South General Hospital (SGH) sa dakbayan sa Naga.

Tungod sa hitabo, mag Valentine’s Day sa prisuhan ang iyang bana nga si Vince (di tinuod niyang ngan), 30, way trabaho, human nadakpan sa igsoon sa biktima ug gi-turnover sa kapulisan, lakip ang .357 magnum revolver uban sa lima ka mga bala ug usa ka kabhang.

Si PO3 Marjoken Misuari, desk officer sa San Fernando police nga nahinabi sa Sun.Star Superbalita, niingon nga ang magtiayon nagkaaway sa wa pa ang hitabo.

Giingong nagselos ang bana sa iyang asawa hinungdan nga nagkalalis kagahapon sa sayo sa buntag.

Ang mga kabanay sa babaye nakadungog og sipang buto sa armas sulod sa lawak hinungdan nga daling gisusi sa inahan sa babaye, igsuon nga lalake ug mga paryente.

Sa pag-abli sa lawak, ilang nakit-an nga nagbitbit sa armas si Vince hinungdan nga nahitabo ang ilang inilugay sa armas tali sa igsuon sa biktima.

Maayo gani kay nailog gyud sa igsuong lalake ang pusil.

Ilang gidakop ang suspek samtang ang ubang mga igsuon ug paryente maoy nipahibawo sa kapulisan sa San Fernando.

Kasong frustrated parricide ang giandam sa kapulisan sa San Fernando batok sa bana.

Samtang kagahapon sa kadlawon, usa ka driver nga giilang si Elisio Casayas, 34, ulitawo, gipusil samtang nitambong og pre-Valentine’s Day disco sa Barangay Libo, lungsod sa Sibonga.