1 ka tuig nga bata nalumos

Tuesday, February 14, 2012

NALUMOS ang usa ka tuig nga batang babaye sa pinutol nga plastic container sulod sa pansayan sa ilang balay niadtong Dominggo sa alas 6:30 sa gabii sa Sitio Quasi, Barangay Tuyom, dakbayan sa Carcar.

Si Jamaica Ombog gideklarar sa mga doctor sa Carcar District Hospital nga dead-on-arrival (DOA) diin siya gidala sa iyang mga kabanay.

Have something to report? Tell us in text, photos or videos.

Si PO3 Randy Cha­vez, imbestigador sa Carcar Police nga nahi­nabi sa Sun.Star Superbalita, niingon nga ang iyaan nga si Janice kapin sa 20 anyos, gikan nilaag sa wa pa ang aksidente.

Dihang niabot sila sa balay, ang bata gibutang sa sala diin kini nagduwa-duwa samtang.

Siya ug ang apuhang lalakeng si Jesus Navoa diha sa may pultahan nagtan-aw sa salida sa telebisyon samtang sa laing bahin sa balay didto sab ang inahan nga si Margie Navoa.

Wa mabantaye sa iya­an ug apuhan nga ang bata nakasulod sa pansayan ug nikab-ot sa plastic container. GPL

Natuwad ang bata ngadto sa container hinungdan nga nalumos.

Niabot ang apuhang babaye nga si Ronora gikan sa gawas sa balay.

Diha na nila mabantayi nga wa si Jamaica hinungdanb nga gisugo ni Jesus si Ronora sa pagpangita sa apo.

Apan nabulabog ang balay dihang nakit-an sa apuhan ang iyang apo nga nasulod sa pinutol nga plastic container sa pansayan nga nagtuwad ang ulo nga nasawom sa tubig samtang ang tiil toa sa ibabaw.

Gidali nila sa pagtabang ang bata.

Usa ka silingan nga ginganlag Ian nipahigayog cardiopulmonary resuscitation (CPR) sa bata apan wa na kini maulii sa panimuot.

Matod pa ni Chavez nga naratol ang tanang mga tawo sa balay nga nagsigi na lang sa paghilak dihang ilang naabtan human nila madawat sa text ang insedenti.

Pag-abot nila sa balay ang bata gipahigda na sa kabanay ug dihang iyang gihimulsuhan bugnaw na kini.

Gidala sa kapulisan sa tambalanan ang bata sa pamasin nga matabang pa apan si Dr. Allan Mercado sa Carcar District Hospital nideklarar niini nga DOA.

Gibutyag niini nga ang inahan sa bata diha sa ilang panimalay, samtang ang amahan wala sa ilang panimalay.

Apan walay foul play ang kamatayon bata sanglit disgrasya gyud ang panghitabo ug kunbinsedo sab ang pamilya niini.

Gibana-bana niining kapin sa ruler ang gitas-on sa plastic container nga giputol sa pagtuyo aron sudlan sa tubig didto sa pansayan.

Ang tubig gikatahong sakto gyud nga napuno ang sudlanan hinungdan nga dihang nikab-ot ang bata nahulog wala nakabali nideretso sa pagkalumos.

“Dugay gyud nadala ang bata kay nangaratol man gud sila unya ingon ang doctor nga pipila lang ka menotos kun dili madali ma-disgrasya kadtong mga malumos kun walay maka-cpr niini’ dugang ni PO3 Chavez.

Si Kapitan Daphne Babao, sa maong lugar nga nahinabi sa Sun.Star Superbalita miingon nga gilubong na hinuon ang bata kagahapong adlawa.

Gibutyag niini nga ilang gitabangan sa paghiluna sama sa lunong nga gisudlan niini.

Matud pa niya nahibulong sila niadtong gabhi-una nga dunay police nga naabot ilang nahibaw-an ang nalumos ang kamayuwangang anak ni Margie Navoa, kinsa buntis usab karong mga higayuna.