2 ka menor nga nangitag disco, gipamusil, 1 tipi

Tuesday, February 14, 2012

NAMATAY ang usa sa duha ka mga menor de edad human gipamusil sa miaging gabii sa dakbayan sa Lapu-Lapu samtang nangitag disco alang sa pagsaulog sa Valentine’s Day.

Ang duha padung manguli kay way disco apan nagsegig sayaw samtang naglakaw dihang gipamusil sa duha ka mga tawo nga nag-motorsiklo pasado alas 11 niadtong Lunes sa gabii, sa may sityo Abuno, Barangay Pajac.

Have something to report? Tell us in text, photos or videos.

Ang biktimang namatay giila nga si Kurt Ngujo, 16, samtang ang naangol giilang mao si Juniel Rosales, 15, pulos nagpuyo sa mao nga dapit.

Matod sa kapulisan nga ang duha ka mga biktima kuyog sa lain pang usa ka menor de edad niadto sa sityo Abuno sa pagtuo nga adunay Valentine disco.

Apan human nila masayri nga niadto rang Dominggo ang disco, nakahukom sila nga moadto na lang sa bilyaran apan daghan gihapong tawo ug wa sila makaduwa hinungdan nga nanguli na lang sila.