Blessed Calungsod sentro sa wali

Sunday, February 19, 2012

SA misa sa mga Simbahang Romano Katoliko sa Sugbo kagahapon, puno sa pagmaya ug ang uban ningsinggit og “Viva San Pedro de Cebu.”

Tungod kini sa ilang kalipay nga hingpit nang ilhon ang unang Bisaya nga santos nga si Pedro Calungsod, yanong sakristan nga nahimong martir human gipatay sa misyon sa Guam uban sa mga Espanyol nga pari sa miaging 350 ka tuig na ang nakalabay.

Have something to report? Tell us in text, photos or videos.

Ang balita bahin sa canonization ni Blessed Pedro Calungsod karong Oktubre ning tuiga daling mikaylap sa tibuok lalawigan lakip sa Leyte.

Si Pope Benedict XVI nipahibawo sa miaging Sabado sa gabii (buntag sa Italy) nga si Calungsod, usa ka Pilipino nga katekista, usa sa pito ka mga beato o beatified people nga gikatakda nga i-canonize karong Oktubre 21, 2012 sa Vatican City.

Ang inila nga personalidad sa pagpanibya ug sa mga drama sa radyo nga si Aljin Abaquita sa dySS Super Radyo nalipay sa maayong balita sa gikatakdang pagbayaw ni Calungsod ngadto sa pagka Santos.

Siya ang director sa inila nga short act play sa kinabuhi ug kamatayon sa Sugbuanong martir sud na sa kapin usa ka dekada.

Matod niya pinaagi sa 20 minutos nga linawas nga pasundayag, diha napasabot ug mas nilungdang sa hunahuna sa katawhan ang mga hiyas nga gihuptan ni Calungsod ug kon kinsa siya isip usa ka yanong katekista ug alagad sa tinuohang Kristiyano.

Ang short act play gisugdan og pasundayag niadtong 2001 sa Santo Tomas de Villanueva Parish sa Barangay Poblacion Pardo siyudad sa Sugbo ug nasundan pa kini atol sa Local World Youth Day nga gipahigayon sa Archbishop Palace sa dakbayan sa Sugbo pipila na ka tuig ang nakalabay.

Sa kinatibuk-an, niabot og 40 ka higayon nga napasundayag ang kinabuhi ug kamatayon ni Calungsod sa nagkadaiyang mga parokya sa lalawigan sa Sugbo.

Si Abaquita nipahinungod sa naangkon nga kalampusan sa iyang career pinaagi sa grasiya ug panabang sa Sugbuanong martir nga ilhon na unya nga San Pedro de Cebu.

“Akong i-attribute ni Calungsod ang naangkon nako nga kalampusan sa akong career, nga tungod sa iyang grasiya nagpabilin pa ko sa industriya,” dason niya.

Si Cebu Archbishop Emeritus Ricardo Cardinal Vidal nga mitambong sa consistory sa Vatican City sa miaging adlaw niluwat og mensahe nga gi-post sa iyang kanhi secretary nga si Fr. Mhar Balili sa iyang Facebook account.

“As the promoter of their cause which began in 1986, I am very grateful to the Lord for the great blessing he has bestowed on our people,” matod sa 81-anyos nga Cardinal.

“I would like to thank all those who have contributed to the promotion of Blessed Pedro’s cause..” dugang pa sa retirado nga arsobispo. SCG/Sun.Star Cebu