Resort gibombahan; dinamita gigamit

Tuesday, February 21, 2012

BEACH resort sa lungsod sa San Remegio gibombahan sa miaging kaadlawon ginamit ang duha ka improvised nga mga dinamita.

Hinuon, way naangol sa mga staff ug guests apan nabulabog ang tanang mga tawo, bisan ang mga silingan niini, tungod sa kakusog sa buto.

Have something to report? Tell us in text, photos or videos.

Ang kapulisan nitataw nga di kini binuhatan sa mga terorista, apan nagsusi sila kon di ba kini may kalabutan sa kasungian sa yuta.

Ngan sa resort gipugngan una samtang wa pa makuhaig pamahayag ang management.

Gipaulbo sulod sa compound sa beach resort ang improvised nga dinamita nga gisulod sa plastic bottle sa mineral water ug ang ‘katol” nga pang-abog sa mga lamok maoy gihimong trigger device kay gisumpay sa blasting cap.

Si SPO1 Joejohnnesky Ynot, imbestigador sa San Remegio police nga nahinabi sa Sun.Star Superbalita, nagkanayon nga ang staff sa resort maoy nipahibawo sa kapulisan sa miaging buntag.

Sa ilang pagsusi sa lugar, ilang nakit-an ang mga tipaka nga nangalagpot sulod sa compound ingon man ang ang yuta nga nabunkag tungod sa ka kusog sa pag-ulbo.

Ila sab nga napalgan ang laing improvised nga bomba nga wa makabuto sanglit napawong ang katol nga gigamit unta sa pagpaulbo.

Human sa buto, nanggawas sa ilang cottages ang mga guest.

Lakip sa nakamata sa kakusog sa buto mao ang mga residenti sa palibot.

Gisubay nila karon ang kaso sa yuta nga nagpadayon pa karong panahuna tali sa tag-iya ingon man sa laing tawo.

Ikaduhang anggulo nga gisubay ang giingong problima sa mga kawani sa resort sanglit ang uban niini nangasuko base sa ilang impormasyon nga nakuha gumikan sa giingong pagsigig pangasaba sa tag-iya.