Laing sinkhole napalgan sa Ginatilan

Wednesday, February 22, 2012

LAING gituohang sinkhole nakit-an sa lungsod sa Ginatilan, Sugbo nga nagsugod lang sa gamay nga liki human sa linog sayo ning buwana.

Gawas sa nagkadakong sinkhole sa Sityo Linao, Brgy. Anao, bukirang barangay sa lungsod, duna say ninggawas nga tubig gikan sa mga liki sulod ug gawas niini.

Have something to report? Tell us in text, photos or videos.

Ang dapit dunay gilay-ong 14 kilometros gikan sa kinapusoran sa lungsod.

Si Barangay Kapitan Vitaliano Cabañog nga nahinabi sa Sun.Star Superbalita niingon nga nagsugod ang pagpangliki sa yuta duha ka adlaw human sa linog niadtong Pebrero 6.

“Gamay ra kaayo, Sir, premiro ana. Mga usa ra na ka dangaw ang liki. Unya maorag nilawom (liki),” asoy ni Cabañog.

Apan samtang nagdagan ang mga adlaw hangtod kagahapon, ang lungag nagkadako.

Iyang gihulagway nga moabot nag 30 ka mga dupa ang gilapdon sa lungag samtang aduna nay gilawmon nga lima ka dupa ang ubang bahin niini.

Ilang namatikdan nga nagkadako na ang pagkahunlak sa yuta ug adunay mga pagpangliki sa palibot niini matag adlaw.

Ang dapit usa ka umahan nga dunay gipangtanom nga mga lubi. Ang mga punoan sa lubi nagtakilid na.

Gawas pa niini, adunay sa tubod sa tubig nga kusog ang agas sulod sa lungag ug sa gawas gikan sa nangliki nga yuta.

“ Kusog, Sir uy. Maorag bukton ang gidak-on (sa lungag) sa bul-og sa tubig ang
migawas. Pero daghan siya mga upat siguro ka tubod,” dugang sa kapitan.

Iyang gihulagway nga tab-ang ang tubig nga susama ra og mainom dihang gipangtilawan sa mga residente.

Apan iya nang gipangbadlong ang mga tawo nga nangtilaw tungod kay nabalaka siya nga posibleng makadaot kini sa pang lawas.

Iya na kining gi-report ngadto sa kapulisan ug kang Mayor Antonio Cinco aron mahimuan og aksyon.

Iya nang gimandoan ang mga tanod nga bantayan ang dapit sulod sa 24 oras ug di na paagian sa mga tawo aron di sila mabutang sa peligro.

“Agianan man gud sa mga tawo nang dapita unya dunay mga bata. Anha agi paingon sa ilang eskuylahan,”matod ni Cabanog        

 Sa higayon nga modako ang lungang adunay di mominus tulo ka mga balay nga naa ra sa duol ang posibleng maapektuhan.

Ang lungag wa pa gyud masusi sa mga eksperto bisan mas una kini nadiskobre kay sa laing sinkhole sa lungsod sa Dumangjug.

Ang sinkhole sa Dumanjug nagsugod usab human sa kusog kaayong linog nga nitay-og sa Negrros ug Sugbo.

Ang mga eksperto namahayag nga di ikahibung kon dunay mga sinkhole dinhi sa Sugbo tu­ngod sa klase sa yuta sa tibuok isla.