Cebuano top 2 sa graduating PMA cadets

SUGBUANON nga anak og usa ka optometrist ang nahimutang sa ikaduhang dapit sa top ten sa 187 ka mga graduating cadets sa Philippine Military Aca­demy Bagwis Class of 2012 nga mogradwar karong Marso 18, Dominggo.

Si Jose Mari Cabrera, 22, taga Barangay Sambag II sa dakbayan sa Sugbo, gitawag sa ilang balay nga Baby Boy, apan human sa iyang kalampusan sa malisod nga upat ka tuig nga military training sa PMA dili na siya makonsiderar nga usa ka baby boy.

Alang niya usa ka overwhelming ang iyang naangkon nga kalampusan og nabayran gyud ang tanan niyang mga sakripisyo ug sa iyang pamilya.

Gawas nga mi-top two, modawat usab si Cabrera sa Vice Presidential Saber and Air Force Professional Course Plaque, Joint United States Military Assistance Group (JUSMAG) Service Award gumikan sa iyang pagka top graduate nga gikatakda malakip sa Philippine Air Force (PAF), ingon man PAF Service Award.

Niadtong Agusto sa 2008, human sa duha ka buwan nga training sa academy, si Cabrera nakahukom unta nga moundang gumikan sa gibati nga grabeng kamingaw ug sa kalisod sa ilang training.

“Feeling nako di na nako kaya,” asoy pa niya.

Alang niya lisod ang unang duha ka buwan sa training tungod kay mao kini ang maisip nga transition period gikan sa pagka sibilyan ngadto na sa kinabuhi sa usa ka military.

Apan human sa pagtimbang-timbang nakahukom si­ya nga dili moundang sa PMA human iyang nakita nga ang iyang mga classmates pursigido nga motapos sa ilang training sa academy ug naka-amgo usab siya nga mausik lang ang paningkamot sa iyang pamilya kon moundang siya. SCG/taho gikan ni RSB sa Sun.Star Cebu