Tom gipikhan ni Mike sa gisul-ob

“KAHIBAWO man ko karong panahuna nga mayor ko. Unya kon magsul-ob ko og congressman, di, nabuang na ko.”

Kini ang paghulagway ni Cebu City Mayor Michael Rama sa iyang kaugalingon kon mosuroy siya sa mga barangay sa siyudad unya ang marka sa luyong bahin sa iyang senina congressman.

Apan klaro nga ang iyang gipitkan niini mao si Cebu City south district Rep. Tomas Osmeña, kinsa nagsul-ob og polo shirt nga “Tomas Osmeña, Mayor” sa likod niini bisan kon siya kongresista.

Kini gisul-ob sa kanhi mayor sa ilang tigom sa Bando Osmeña Pundok Kauswagan (BOPK) niadtong Sabado sa White Gold House.

Si Rama nagkanayon nga masuko ang iyang kaatbang kon mutawag siya sa iyang kaugalingon og “ I’m the mayor.”

“Suko pa sila. Simple ra man. Ako giingon nila, ako ra man gipaklaro kay naa ra bay magsul-ob sul-ob, lagi mayor na sila,” matod ni Rama.

Matod ni Rama nga iyang gisulti ang maong pulong sanglit adunay nagpakaron ingon nga mayor kinsa nagsuroysu­roy na karon sa dakbayan.

Matod niya nga aduna say mga tawo nga motawag kaniya og congressman ug iyang gisultihan nga babaye ang congressman sa north district.

Siya nipasabot nga ang iyang pag-angkon nga “ I’m the mayor” wa nagpasabot sa iyang pagkahawod subay sa pagsabot ni Kongresista Raul del Mar, kinsa usa ka higayon niana ginganlan ni Rama og way personality sa mga kalihukan ni Rep. Rachel Marguerite del Mar, iyang anak, kay usa siya ka sibilyan.

Matod pang Rama nga gusto niyang hatagan og kagawasan ang iyang kaugalingon kay di na siya ganahan nga magsige og simhot sa lubot sa “kabayo” mao nga nigawas siya sa BOPK.

Samtang di niya tugotan nga si Osmeña makasemento og legasiya nga mahimo kaayo niya samtang siya mayor.

Si Osmeña namahayag nga sa iyang pagbalik pagkamayor sa 2013 elections iyang himuon ang “free night college” sama sa ‘night high school’ nga proyekto ni Bise Mayor Joy Young.

Si Rama sa iyang bahin nagkanayon nga wa siyay supak sa maong plano apan gikinahanglan nga tun-an kini og maayo sanglit di maayo og performance nga gipakita ang mga tinun-an sa night high school sa siyudad.

“Walay problema na (free night college). Nganong siya (Osmeña) pa man, di kita na lay buhat ug di siya pabalikon,” padayag ni Rama.

Ang mayor nagkanayon nga iyang gitahasan si Ester Cubero sa local school board ug Ofelia Oliva, city treasurer, sa pag-monitor sa mga tinun-an sa night high school kay di maayo ang ilang pagtuon.