Hinabang nagbaha; housing, school supplies gikinahanglan

NAGKADAGHAN karon ang mga hinabang nga gipanghatag ngadto sa mga biktima sa sunog sa dakbayan sa Mandaue niadtong milabayng diin nagkumboya ang mga piniling opisyal sa lalawigan sa Sugbo ug dakbayan sa Mandaue aron apuran silag mga relief goods.

Samtang ang mga lumolupyo namahayag nga mas gikinahanglan nila ang housing materials ug school supplies.

Niabot og 272 ka mga pamilya ug 237 ka mga balay ang apektado sa sunog nga niigo sa Sitio Kalderohan, Barangay Paknaan, matod ni Mandaue City public information officer Roger Paller.

Si Rep. Luigi Quisumbing, (6th district, Cebu), niapod-apod og 250 ka putos nga basic supply packs human sa sunog.

Ang mga putos may sud nga bugas, banig, senina, de lata ug noodles.

Ang iyang mga staff nagluto og lu­gaw sa dapit niadtong Miyerkules sa gabii alang niadtong gigutom nga mga biktima, matod sa district office ma­nager ni Quisumbing nga si Jessie Perez.

Si Gob. Gwen Garcia, kinsa nibisita sa dakbayan sa Davao, niawhag kang PB Member Teddy Ouano nga maoy morepresentar sa Kapitolyo aron moapod-apod sa mga pagkaon ug ubang mga panginahanglan sa mga biktima.

Ang iyang manghod nga si Kong. Pablo John Garcia nga maoy pag-abot kagahapon gikan sa Manila nipadala sa iyang mga staff aron manghatag usab og hinabang sama sa mga kaldero, pinggan ug baso unya nagsusi kon unsa pay mga panginahanglan nga ilang mahatag ngadto sa mga nasunogan.

Si Pablo John nasayran nga nianunsiyo nga magpapili sa pagka-gobernador sa sunod tuig nga eleksyon diin ang dakbayan sa Mandaue sakop sa lala­wigan sa Sugbo.

Samtang, si Mandaue City Councilor Lollipop Ouano Dizon nanghatag usab og balde nga may sud nga noodles ug tualya.

Matod sa mga lumolupyo nga ilang giantos ang katugnaw sa kagabhion ug kainit panahon sa adlaw aron lang sila magpabilin sa lugar kay nahadlok silang dunay mangawala.

Dunay mga ginikanan nga nangabalakang di na makatunga ang ilang mga anak kay nangasunog ang ilang school uniforms ug supplies nga napalit na.

Kagahapon, gihisgutan ang mga hinabang pinansyal alang sa mga biktima.

Ang mga tag-iya sa balay hatagan og tag P10,000 samtang ang mga nag-abang tunolan og tag P5,000.