Pulis gikiha og abuso sa asawa

GIKIHA ang pulis og pagpangabuso sa iyang asawa tungod sa kanunay nga pagpangutala kaniya sa higayon nga sila mag-away.

Nagsugod ang pag-aslom sa relasyon sa magtia­yon mga 12 ka tuig na ang nakalabay human masakpi sa asawa ang iyang bana ug manghod nga nag-sex sulod sa ilang kuwarto.

Giingong nakabaton og usa ka anak ang iyang bana ug iyang manghod.

Diha pay higayon nga gidala siya og usa ka hotel sa Cebu City downtown ug gipasulod sa iyang bana ang iyang usa ka amigo.

Giingong gimandoan siya sa iyang bana nga makig-sex sa iyang amigo, apan wa gyud siya mosugot.

Sa kaluoy sa amigo sa iyang bana, nilakaw kini nga wa siya hilabti.

Ang Cebu City Prosecutor’s Office nipaabot na ning kasong kalapasan sa Republic Act (RA) 9262 kun Anti-Violence against Women and their Children Law batok sa pulis ngadto sa korte.

Apan, di mahimong hisgutan ang mga ngalan sa mga nalambigit ning kaso kay gidili sa balaod.

Nalatid sa reklamo sa asawa nga niadtong 2009 nagbuwag sila sa iyang bana nga pulis tungod sa kanunay nga pagpangulata kaniya sa higayon nga mag-away sila.

Nagsugod ang di maayong relasyon sa magtiayon human masakpi sa asawa nga nag-sex ang iyang bana ug ang iyang manghod nga babaye sud sa ilang kuwarto mga 12 ka tuig na ang nakalabay.

Di pa igo, matod sa asawa, gidala siya sa iyang bana sa usa ka hotel sa Cebu City
downtown kay dunay dautang plano ang iyang bana.

Gipaadto sa iyang bana ang iyang amigo ug gimanduan sila nga mag-sex apan nagpakiluoy siya sa iyang bana apan gidapatan hinuon siya.

Wa mahinayon ang plano sa bana kay naluoy ang amigo niini kaniya.

Niadtong miaging tuig, samtang siya natug sa kuwarto, nisud ang iyang bana ug gipugos siya nga mag-sex sila apan nibalibad siya hinungdan nga gikulata na usab siya niini.

Iyang gitumbok nga ang pulis nisagpa sa iyang nawong ug gipatiran ang parte sa iyang lawas nga gi-operahan hinungdan nga giduol sa ilang kamaguwangang anak ang iyang amahan.

Apan, nakatilaw usab og sagpa ang ilang kamaguwangang anak ug gihulga silang patyon niini.

Wa na siya makaagwanta sa iyang natagamtaman sa iyang bana, nibalhin silag laing balay ug nipasaka siya ning kaso sa piskaliya.

Nalatid sa reklamo sa asawa nga nagranggo og PO2 ang iyang bana apan wa nalatid kon asa siya madestino isip sakop sa kapulisan.

Nahimong makapiyansa ang suspek sa kantidad nga P12,000 ning giatubang niyang kaso.