Truck ban ipatuman sa Talisay; warning lang una

SUGOD karong adla­wa ipatuman na sa ka­gamhanan sa dakbayan sa Talisay ang truck ban sa pipila ka mga dalan sa siyudad.

Si Bise Mayor Alan Bucao niingon “soft implementation” lang sa ang mahitabo ug hatagan og higayon ang mga tawo nga mapahibawo sa ordinansa labot niini.

“Mo-implement na ta pero advise lang usa ta sa katawhan if ever naay di mopatuo sa atong warning ato na gyud dakupon,” matod ni Bucao dihang nahinabi sa Sun.Star
Superbalita kagahapon.

Si Gerard Lariego, pangu sa traffic monitoring sa City of Talisay Operations and Development Autho­rity (CT-TODA), niangkon nga dili malikayan nga dunay motumaw nga panaglalis sa pagpatuman na sa truck ban hinungdan nga pahimangno-an lang usa nila ang mga truck driver.

“Dili sa derecho ang pagpanakop, mopahi­mangno lang sa seguro ta kay dili ta gusto naay panaglalis kay naa pa may uban nga wala pa makahibawo. Pero katong dili motuo bi­­san og nakahibawo na atong dakpon kay makuha man nato ang plate number,” pagpasabot ni La­rie­go dihang nahinabi sa Sun.Star Superbalita.

Ang maapektuhan sa ban kadtong mga truck nga dunay gross capacity weight nga 4,500 ka kilo sama sa fuel tanker, cement bulk carriers, cargo truck, container cans ug uban pa.

Ang ordinansa sa pagpatuman sa ban gipirmahan ni Mayor Socrates Fernandez niadtong Ma­yo 29, 2012.

Base sa ordinansa, apil sa truck ban ang mga dalan sa Rabaya St., Pulong Deiparine St., Prisco Deiparine St., Sangi Road, San Roque-Laray Road, Leoncio Abarquez St., Vicente Garces St., Fidel Bas St., Cong. Antonio Bacaltos St., (Sombria-Pooc Road), Fidel Bas St., (Linao-Mohon Dumlog St., ug Rizal St., (dalan gikan sa Dumlog hangtod sa Poblacion).

Ang ban ipatuman su­­­god alas 6:00 sa buntag hangtod alas 8:00 sa buntag ug alas 4:00 sa hapon hangtod alas 7:00 sa gabii, Lunes hangtod sa Biyernes.

Ang mga sakyanan nga way labot sa ban naglakip sa mga truck ug heavy equipment sa kagamhanan sa Talisay, ingon man mga truck ug sakyanan sa Department of Public Works and Highways, Bureau of Jail, Management and Penology, Engineering, am­bulansiya, fire truck ug u­ban pa.

Pipila sa mga negus­yante ang nipadayag og pagsupak sa ban tungod kay matod nila makaapekto kini sa ilang patigayon labi na kadtong nalambigit sa delivery ug logistics.

Si Bucao, nangamahan sa maong ordinansa ug chairman sa CI-TODA nanalipod sa pagpatuman sa truck ban.

Iyang gipasabot nga makatabang pa hinuon kini sa mga negusyante gumikan kay mas sayu­hon na ang oras sa pag-deliver sa mga truck.

Ang bise mayor nidu­gang gusto nila i-synchronize ug mausa ang truck ban nga gipatuman sa Talisay City ug sa Cebu City.

“Mag-prevent ni nga ma-overcrowded ang mga narrow streets sa Talisay. Kay ang Talisay pundohanan sa mga truck before entering Cebu City,” pasabot ni Bucao.

Kadtong mga drayber nga masakpan nilapas niini, pamultahon og P1,500 alang sa first offense, P2,500 o pagkapriso sud sa usa ka semana alang sa second offense ug P5,000 o pagkapriso gikan sa du­ha ka semana hangtod sa usa ka buwan alang sa third offense.