Facebook gigamit sa 'pedophile'

CEBU CITY -- Wa moangkong sad-an ang Australian national nga gipasakahan og kasong qualified trafficking human giingong niabuso siya sa tulo ka mga batang lalake nga iyang gikaila pinaagi sa Facebook niadtong miaging tuig.

Ang langyaw gibasahan sa iyang giatubang nga mga kaso kagahapon sa korte ubos ni Regional Trial Court (RTC) Judge Ester Veloso.

Nalatid sa Anti-Trafficking in Persons Act nga ang media di mahimong mohisgot sa mga ngalan sa suspek ug nireklamo sa balita sa kaso.

Ni-plead not guilty siya sa pito ka mga kasong qualified trafficking in large scale nga gipasaka batok kaniya.

Si Jonah John Ungab, abogado sa Australian national, namahayag nga mosang-at siya og mosyon nga usahon ra tanan ning kaso nga gipasaka batok sa iyang kliyente.

Ang langyaw gipasakahan usab sa kasong child abuse nga anaa sa RTC Branch 22 ubos ni Judge Manuel Patalingjug.

Buot ni Ungab nga usa lang ka huwes ang mohupot sa kaso.

Niadtong Disyembre 2011, ang Regional Anti-Human Trafficking Task Force nisikop sa langyaw sud sa usa ka hotel sa dakbayan sa Sugbo.

Nakadawat og case referral ang kapulisan sa Pilipinas gikan sa Australian Federal Police didto sa Manila nga may molupyo silang nikontak og 13-anyos nga batang lalake pinaagi sa Facebook.

Ang Australian Federal Police nipahibawo sa ka­pulisan nga ang suspek nag-estar sa dakbayan sa Lapu-Lapu.

Ning impormasyon, ang kapulisan nakasakop sa suspek ug ilang gisikop unya ilang na-rescue ang 15 ug 16 anyos nga batang lalake.

Nalatid sa reklamo sa mga biktimang lalake nga giabusohan sila sa langyaw bugti sa kantidad nga P500 ngadto sa P2,000.