Kaso batok sa pulis giduso na sa korte

MAG-ATUBANG og kasong frustrated murder ang pulis nga giingong nipusil sa usa ka caretaker sa farm niadtong 2005 didto sa dakbayan sa Naga.

Ang Department of Justice (DOJ) nirekomendar sa piskaliya sa dakbayan sa Naga nga ikiha si PO3 Leoncio Salubre Jr. human ilang gibasura ang petition for review sa iyang kaso.

“Other than his bare denials and alibis, respondent Salubre failed to present strong that would merit (pardon),” matod ni DOJ Undersecretary Francisco Baraan III.

Hinuon, mamahimong kasamtangang makalingkawas ang pulis ning giatubang niyang kaso kay gitugtan siyang makapiyansa og P200,000.

Si Salubre sakop sa San Fernando Police Station giingong nipusil kang Jerson Granton sa ulo niadtong Oktubre 16, 2005 didto sa Barangay Pangdan, Naga City.

Gidala siya sa hospital ug nakalingkawas siya sa kamatayon.

Sa iyang bahin, si Salubre nihimakak sa pasangil kay niadtong higayona nibisita siyag patay unya nakadungog siyag buto-buto luyo sa kapilya.

Gitawag siya sa barangay kapitan nga morespondi ug dihang niabot siya sa duol sa tindahan nakit-an niya si Granton nga diha naglubog na nga may dugo ang ulo niini.

Dihang iyang nakit-an si Roberto Quines nga nagdalag armas, giingnan niya kini nga mo-surrender ug dihang kalit ning nahanaw nibalik siyaug gidali niya sa pagdala sa tambalaan si Granton.

Apan, si Quines nisaysay sa iyang affidavit nga si Salubre ang nipusil kang Granton.

Kauban sa trabaho silang Quines ug Granton.

Sa wa pa mahitabo ang insidente, nangla­kaw silang Granton ug Ruel Estrada paingon sa tindahan dihang ilang nakit-an si Salubre.

“Hunong mo diha. Pulis ni. Jun Salubre ni. Mga buang mong dako. Dili mo mopahawa diha, dili man na iyong yuta, kay Tiyo Carding na. Patyon ta mo,” pagkutlo ni Quines sa gisulti ni Salubre.

Dihang paingon nang modagan si Quines, may laing tawo nga nagsul-ob og bonnet ang nition og armas kaniya hinungdan nga nisuway siya sa pag-ilog sa armas unya dihang nagpaingon si Salubre nidagan siya ug nitago sa kabugangan.

Si Estrada namahayag nga nisuway siyag dagan apan si Salubre nition kaniyag armas.

Matod niya nga ang suspek nimando kaniya nga ingnon ang pulis nga si Quines ang nipusil ni Granton.

Si Selene Repunte, amo nilang Granton ug Quines, nisumiter og pamahayag nga si Salubre nasuko sa presensiya nilang Granton sa yuta nga giprinda sa iyang inahan ngadto kang Ricardo Alicante.

Dihang si Alicante napakyas sa pag-ani sa mga tanom, ang ugangang lalake ni Salubre ang nihimo niini.