Kapitan naigo sa awto, patay

BARANGAY kapitan namatay human nadasmagan sa awto dihang nilabang human nika­naog sa bus pasaheroan niadtong Lunes sa alas 7 sa gabii sa Sitio Pana­gikan, Barangay Tapon, lungsod sa Dalaguete.

Si Antonio Vergaño 61, minyo kapitan sa nahisgutang barangay, kanhi konsehal sa lungsod sulod sa tulo ka mga termino namatay pipila ka oras human nidangat sa South General Hospital (SGH) sa dakbayan sa Naga.

Nadakpan si Rodnel Ponce, 25, ulitawo, taga Ba­rangay Candabong, lung­sod sa Argao, trabahante sa usa ka surplus company sa dakbayan sa Mandaue, kinsa maoy nagmaniho sa Nissan Mars (KEG-285).

Si PO3 Christopher Requina, desk officer sa Dalaguete Police nga nahinabi sa Sun.Star Superbalita, nagkanayon nga si Vergaño gikan sa dakbayan sa Sugbo sakay sa Ceres Bus.

Apan sa pagkanaog niini sa bus ug nilabang sa karsada, niagi ang awto nga gimaniho ni Ponce hinungdan nga siya nadasmagan.

Gidali kini sa pagdala sa tambalanan, apan na­kabsan sa iyang kinabuhi sa pagkakadlawon kagahapong adlawa.

Si SPO1 Veronico Centeno, sa Dalaguete Police nga nahinabi sa Sun.Star Superbalita nagkanayon nga kagahapon sa hapon gipasakaan gyud og kasong reckless imprudence resulting to homicide si Ponce kay wa makig-settle si Betty, asawa sa biktima, midwife sa rural health unit sa lungsod.