Namatay nasubay sa cell phone

ATAKE sa kasingkasing ang namatyan sa usa ka British national nga napalgang patay sulod sa iyang sakyanan nga nakaparada sa parking area sa usa ka mall sa miaging adlaw.

Tungod sa global positioning system (GPS) sa iyang cell phone, nasubay ang iyang nahimutang apan patay na siyang napalgan sulod sa iyang sakyanan.

Ang GPS usa ka tracking device nga mahimong ibutang sa cell phone nga makatabang sa pagsubay sa nahimutangan sa tag-iya o naggamit sa telepuno.

Sa sayo pa si John Cristopher Hayes, 51, temporaryong nagpuyo sa Brgy. Talamban, dakbayan Sugbo, usa ka consultant sa usa ka dakong kompaniya sa Mactan Export Processing Zone, napalgan nga patay pasado alas 11 sa buntag niadtong Lunes sa parking lot sa usa ka mall.

Kini human wa siya makatambong sa usa ka meeting sa kompaniya nga iyang gitrabahoan.

Sa pasiuna nga imbestigasyon nga gihimo nila ni SPO1 Victor Ruel Ayuman, PO3 Lou Pagara ug PO1 Esmer Escultor sa Homicide section nagbutyag nga way nakitang samad o bun-og sa lawas sa biktima sa biktima atol sa autopsy nga gihimo sa milabay nga gabii.

Subay sa resulta sa autopsy ni Police Chief Inspector Jon Martin Fuentes sa PNP crime Laboratory, si Hayes namatay tungod sa “Myocardial infarction with pneumonia”.

Napalgan usab sulod sa iyang sports utility vechile (SUV) (plate number YKH-251) ang tulo ka mga basiyo sa botilya sa ilimnon nga makahubog nga ang usa kinuhaan.

Dugang nasayran sa kapulisan nga si Hayes mibiya sa iyang gipuy-an pasado alas 9 sa buntag niadtong Lunes ug paingon ngadto sa mall aron pagtambong sa usa ka business meeting.

Apan nahibulong na lang ang driver nga si Roger Ybanez ug ang security guard nga si Veronico Flores nga wa pa moabut sa meeting si Hayes.

Gisuwayan sa pagtawag ang biktima sa iyang cell phone, apan wa motubag bisan
makadaghan na kini gitawagan.

Ang kompaniya nga iyang gialagaran mi-request sa usa ka telecommunications company sa pagpangita sa signal sa cellphone ni Hayes ginamit ang GPS aron masayran ang iyang nahimutangan.

Didto na masayri siya sulod sa usa ka mall.

Nagsugod pagpangita ang mga sakop ni Hayes uban ang mga security personnel sa mall hangtod nga nakit-an ang iyang sakyanan nga nakaparada sa parking bay nga wa mag-andar.

Didto makita ang biktima nga wa nay kinabuhi.

Si security Guard Emma Alvansado sa mall nagkanayon nga katapusan niyang nakita ang biktima nianang pasado alas 9 sa buntag nga nigawas ug niduol kaniya kay nangayo og tabang sa pagpangita sa iyang sakyanan.

Nakita sa lady guard nga human matoltoli ang sakyanan, nisulod si Hayes sa iyang sakyanan ug iya na kining gibiyaan.