'Peke' nga pulis nasikop

RUSSIAN national nga nagpailang sakop sa International Police Commission (Ipolcom) gibalhog sa prisuhan human nagpabuto sa iyang armas nga nakapaukay sa mga residenti ug kapulisan kagahapon sa alas 3 sa hapon sa Sitio Looc, Barangay Poblacion, Argao.

Ang dapit nahimutang mga 100-200 ka metros gikan sa police station.

Sa pakisusi sa kapulisan, nasuta nga fake ang mga dokumento nga iyang gipakita human nila masusi ang mga ahensya sa kagamhanan kalabot sa giingong pagka pulis niini.

Si Yuri Saminskiy, 34, gikatahong negosyante kasamtangang nagpuyo sa EGI Hotel sa Barangay Maribago, dakbayan sa Lapu-lapu, nakuhaan og usa ka caliber .40 pistol, uban sa 14 ka mga bala ug 10 ka kabhang.

Lakip sa nakuha sa possession ang giingong identification (ID) card sa Interpol nga nagpa­kita nga siya nagranggo og major nga sakop sa Commando Network Inc., uban ang mga badge nga gikan sa gawas sa nasod.

Nitingkag ang dunggan sa mga pulis human siya nipakita sa mission order gikan sa usa ka General Alfredo B. Bartolome sa Camp Crame nga gipitsahan niadtong Enero 14, 2012 nga mapupos karong Septi­yembre 11, 2012.

Ang director karon sa PNP mao si Director Gene­ral Nicanor Bartolome.

Sa mission order gibutyag nga mopahigayon silag intelligence surveillance undercover.

Si Insp. Alejandro Batobalonos, hepe sa Argao Police nga nahinabi sa Sun.Star
Superbalita , nagkanayon nga naalarma sila human ilang nabati ang sunod-sunod nga mga buto sa armas mga 100-200 metros gikan sa ilang Police Station.

Nagtuo sila nga illegal nga mga nanagat ang responsabli sa buto-buto gikan sa baybayon.

Hinungdan nga gibahin gilayon niya ang iyang mga sakop sa duha ka mga grupo ug gisusi ang gigikanan sa buto-buto.

Nasugatan sa iyang mga sakop sa pikas habig ang langyaw nga dunay kuyog nga laing mga langyaw nga naghukas.

Dihang nagpailang silang pulis, giimbetar kini sa pulis ug gi-surrender ang armas dayon gidakop.

Sa gihimong imbes­tigasyon, ang langyaw ni­butyag nga naglingawlingaw lang siya sa pagpahigayon og firing sa dagat mga 70 metros ang gilay-on nga gipraktisan sa pagpusil ang plastic gallon.

Nasuta sab nga nakainom ang langyaw nga kanunay mosuroy sa iyang higala sa maong dapit.

Apan ang nakapatingla kanila kay nipakita kinig mga ID sa Ipolcom ug mission order sa PNP nga tataw kaayong mga peke.

‘Kataw-anan kaayo nga mopaila siyang dunay mission nga nasukwahi kay nagpakita siyag dili maayong pamatasan. Dapat unta modelo siya, maglikay nga mahibaw-an,” dugang ni Batobalonos.

Sa pagsusi niya sa bu­hatan sa Transnational Crime Office diha sa Police Regional Office (PRO-7) kagahapon sa hapon nasuta nga peke ug way records si Saminskiy, sumala pa ni SPO2 Allan Pepito, kinsa gitawgan ni Batobalonos.

Gikompirmar sab sa Firearm and he Firearms Explosives Security Service Agency and Guards Supervisory Section (FESSAGS) sa Central Visayas nga way permit ingon man pangalan ni Saminskiy.

Gipasabot niya nga ang langyaw arestado tungod sa kasong alarm and scandal, ingon man kasong illegal possession of firearm kon di maka-produce og mga dukomento sa armas.