3 ka bata `gihinol’ sa religious leader

GIREKLAMO og pangmolestya sa tulo ka mga babaye nga mga miyembro sa usa ka Christian congregation ang ilang religious leader sa lungsod sa Tudela, sakop sa isla sa Camotes.

Ang duha sa mga biktima nagpangedaron og 12 ug 14 na karon samtang 25 anyos na ang ikatulo nini.

Ang giingong pangmolestya nahitabo niadtong 2004, 2007 ug 2009.

Niini, ang tulo ka mga biktima ningdangop sa kapulisan aron pasakahag kasong acts of lasciviousness nga may relasyon sa Republic Act (RA) 7610 kun Child Abuse si Roy (di tinuod niyang ngan) hinungdan nga gisang-at ning kaso sa Cebu Provincial Prosecutor’s Office.

Bag-o lang nasayran ang giingong pangabuso hinungdan nga bag-ohay lang sab napasaka ang mga kaso.

Nisaysay ang unang biktima nga nag-edad og 25 nga niadtong Marso 2004, dihang siya 17-anyos pa, samtang diha siya sa buhatan sa congregation sa Tudela uban sa mga sakop sa choir aron mag-practice sila og kanta alang sa fiesta sa lungsod sa San Francisco, kalit nga gibikugan ang walang bahin sa iyang dughan.

Gidala siya sa balay tupad sa buhatan sa congregation apan si Roy nitanyag nga siyay momasahe sa dughan sa biktima.

Dihang wa nay tawo sa balay, kalit nga gipasok sa suspek ang iyang kamot ilawom sa blouse unya gihapak ang iyang dughan sa makadaghang higayon.

Iyang gipugngan si Roy kay nagtuo siya nga ang mosunod nga mahitabo makig-sex na kini kaniya.

Samtang, ang ikaduhang biktima nga nag-edad og 14 anyos na karon nisaysay nga niadtong
2007 dihang naghigda siya uban sa iyang manghod nga lalake sa balay sa suspek, kalit siya nga giduol ug gipangutana kon naayo na ba ang sakit sa iyang tiil.

Gitubag kini niya nga gamay nalang ug nitanyag si Roy nga hiluton kini niya aron maayo ug nisugot siya tungod sa iyang respeto isip ilang disipulo.

Ang ranggong disipulo maoy labing dako sa usa ka chapter sa mao nga congregation.

Matod sa bata nga dautan og tinguha kaniya ang akusado kay ang iyang mga kamot, samtang naghilot, niabot sa iyang hawak ug natingala siya kay gihikap man hinuon niini ang iyang kinatawo sud sa duha ka mga minutos.

Ang ikatulong biktima nga nagpangedaron og 12 nitug-an nga samtang nag-edad pa siya og 9-anyos, samtang nakigduwa siya sa iyang mga higala nga sakop sa choir niadtong 2009, kalit nga nisakit ang iyang walang pulso.

Niini, nitanyag si Roy nga iyang hiluton ug kay taas man ang ilang respeto niini isip disipulo sa congregation, nisugot siya apan nasurprisa siya nga gihikap man ang iyang dughan.

Human sa insidente, magpalayo na siya sa suspek ilabi na sa higayon nga mag-practice sila sa choir.

Gitug-anan na niya ang iyang inahan sa gibuhat ni Roy kaniya human nakadungog siya sa mga tabi-tabi nga duna kiniy laing duha ka mga biktima nga iya ra sang mga kauban sa choir.