Patay nahanaw sa ospital, napalgan na sa punerarya

NAHANAW ang 72 anyos nga lalake nga gi­bilin sa iyang ig-agaw sa Minglanilla District Hospital (MDH) aron mopa­lit og tambal.

Nasurprisa ang kaba­nay kay sa iya ng pagbalik gisultihan siya sa hospital personnel nga kini namatay na ug didto na niya nakaplagi sa punerarya apan di i-release kon di sila makabayad og P8,000.

Ning insidente, ang Cebu Provincial Health Office (CPHO) nisusi karon kon may kalapasan ba nga nahimo ang mga sakop sa MDH sa nahitabo kang Wilfredo Castroverde, 72, ulitawo, taga Barangay Panadtaran, lungsod sa San Fernando, Sugbo.

Gikataho nga si Castroverde gidala sa iyang ig-agaw nga si Marcial Castroverde sa hospital niadtong gabii sa Hunyo 9 aron patambalan.

Gihangyo si Marcial sa hospital personnel nga mopalit og tambal alang kang Wilfredo apan dihang nibalik siya sa pagka-buntag sa Hunyo 10, gipahibawo siya nga namatay na kini.

Gipahibawo siya nga ang lawas ni Wilfredo atua na sa Holy Spirit Funeral Homes nga nahimutang sa Barangay Tunghaan, Minglanilla.

Niini, nagdala si Marcial og porlon aron masakyan sa namatay apan gipugngan siya sa punerarya kay di nila i-release ang lawas kon di sila makabayad og P8,000.

Ang natagamtaman ni Marcial iyang gipaabot kang CPHO chief Cristina Giango uban sa hangyo nga makuha ang lawas ni Wilfredo apan wa silay ikabayad.

Si Giango nitahas kang Nurse III Rose Jao nga mosusi sa reklamo ni Marcial.

“Nganong na-release ang patay (sa Minglanilla District Hospital) nga wa ang tagtungod?” kini ang buot nga masusi sa hepe sa CPHO ning kaso ni Castroverde.

Si Giango nga nahi­nabi sa Sun.Star Super­balita buot usab untang matan-aw ang records kon niabot ba gyod si Wilfredo sa MDH.

Iyang giklaro nga di ang doktor sa MDH ang nipirma sa death certificate sa namatay.

Ang nahiaguman sa kabanay ni Castroverde, gi-refer ni Giango sa Cebu Provincial Social Welfare Development Office (PSWDO) ilabi nang naglisod sa pagpagawas sa patay sa punerarya.

Ang PSWDO nipahi­bawo nga kagahapon sa buntag gi-release na sa Holy Spirit Funeral Homes ang patayng lawas ni Wilfredo.

Nisaad ang buhatan nga mobayad og P5,000 apan way labot niini ang lungon. Ang Barangay Panadtaran na ang mohatag og lungon sa namatay.

Giklaro sa PSWDO nga P3,000 lang ang ilang ihatag nga hina­bang apan kay naglisod man ang kahimtang sa banay ni Castroverde, mohangyo sila kang Gob. Gwen Garcia nga P5,000 ang ilang ihatag niini.

Si Garcia lang ang maka-aprobar kon mosobra na sa P3,000 ang ilang ihatag nga hinabang.

Samtang, si Marit Herediano sa Holy Spirit Funeral Homes namahayag nga na-release na nila ang lawas ni Wilfredo kagahapon.

Nipadayag si Herediano nga may lalake o security guard sa hospital ang nitawag kanila kabahin sa patay hinungdan nga ilang gikuha ug gidala.