Suweldo sa titser sa summer class giandam: DepEd

GIHIKAY na sa Department of Education (DepEd) Cebu City ang P1.464 milyones nga su­holan alang sa kapin 50 ka mga magtutudlo kinsa nipahigayon og special classes sa kindergarten ni­adtong summer.

Si Superintendent Rhea Mar Angtud, pangu sa DepEd Cebu City, nitug-an sa Sun.Star Superbalita nga niadto pang Mayor 9 ning tuiga nila giduso ang tanang mga dokumento ngadto sa Department of Budget and Management (DBM) alang sa pundo.

Gipasabot ni Angtud nga naghuwat na lang sila sa Special Allotment Release Order (SARO) gikan sa DBM aron ila nang mahatag ngadto sa mga regular ug non-regular teacher nga nipahigayon og special classes alang sa mga kindergarten niadtong buwan sa Abril ug Mayo.

Samtang gipadayag sa DepEd superintendent nga nagpadayon ang pagpanghatag sa mga tsiki ngadto sa mga kindergarten teacher nga wa pa masweldohi niadtong Pebrero ug Marso ning tu­iga.

Gipasabot niya nga nalangan ang paghatag sa suholan sa 222 ka mga magtutudlo sa kindergarten kay ang Saro nga giluwatan sa DBM nag-ingon nga gikan sa Hunyo hangtod sa Disyembre 2011nga balor sa suholan sa mga magtutudlo apan wa dayon makita sa Commission on Audit (COA) nga hangtod diay sa Marso 2012 ang klase gumikan sa gamay nga note nga gibutang sa ubos nga bahin sa Saro.

Gumikan niini, ila unang gigamit ang pundo gikan sa maintenance and other operating expenses (Mooe) alang sa duha ka buwan nga suholan sa mga magtutudlo apan ulian ra ang DepEd sa naggasto gikan sa Saro sa DBM.